Выстава «Кожны дзень. Супраць у беларускіх рэгіёнах»

У MediaPortBelarus адкрываецца выстава «Кожны дзень. Супраць у беларускіх рэгіёнах». На ёй будуць прадэманстраваны фотаздымкі беларускіх рэгіянальных журналістаў з пратэстаў 2020 года.

Выстава адкрываецца 9 жніўня ў 18:00. Фотаздымкі з Гродна, Брэста, Маладзечна, Ганцавічаў, Чачэрска, Бабруйска, Глыбокага, Шаркаўшчыны можна будзе пабачыць у MediaPortBelarus (Sienkiewicza 44) у Беластоку.

Кожны дзень беларускага супраціву ад 2020 года адначасова падобны і не падобны на іншыя, але іх яднае, што людзі знаходзяць спосабы паказаць пратэст у самых небяспечных умовах. На выставе будуць паказаныя самыя яркія фотаздымкі з розных гарадоў Беларусі, якія знялі мясцовыя фатографы, што цяпер мусяць быць за мяжой.

Арганізатары скіруюць увагу на тое, што пратэсты былі не толькі ў Мінску, але і нават у самых маленькіх населеных пунктах.

— Мы перададзім, якой цаной беларусы расплачваюцца за свой супраціў. Акцыя стане першай фотавыставай пра пратэсты ў Беларусі, якая яднае рэгіёны, — падкрэсліваюць арганізтары.