Увесну будзе новая вялікая міграцыйная атака на польскую мяжу з боку Беларусі, таму будова плоту на беларуска-польскай мяжы — абавязковая. Пра гэта расказаў кіраўнік Міністэрства унутраных спраў Польшчы Марыюш Каміньскі.
Інтэрв’ю тыднёвіку Sieci цытуе PAP:
— Лукашэнка не дасягнуў ніводнай са сваіх мэтаў, адбіўся ад нашай мяжы, — сказаў Каміньскі. — Нашы функцыянеры, якія працуюць на пастарунках узімку, па начах, нягледзячы на стому, што нарастае праз тыдні, — могуць ганарыцца сабой. А мы ганарымся імі.
Дадатковыя вайсковыя сілы на мяжы з Беларуссю застануцца, пакуль плот не будзе канчаткова дабудаваны, паведаміў Каміньскі. На сённяшні момант адміністрацыйныя структуры Польшчы ўжо заключылі ўсе неабходныя кантракты з праверанымі будаўнічымі фірмамі. Паводле гэтых дамоў, плот будзе здадзены ў эксплуатацыю ўжо ў чэрвені. Ён будзе таксама абсталяваны ўсёй неабходнай тэхнікай.
