У ДТЗ пад Варшавай загінуў беларускі палітуцякач і стваральнік навагрудскага прыватнага музея Сяргей Лаўрушчык. Пра гэта паведаміла «Радыё Свабода».
На працягу шасці гадоў Лаўрушчык ствараў прыватны музей у Навагрудку. Пакоі ў сваім доме ён адвёў пад розныя гістарычныя эпохі Беларусі.
Год таму праз актыўны ўдзел у пратэстах да мужчыны прайшлі сілавікі. Гэта адбылося ў дзень нараджэння Сяргея, 23 сакавіка. Экспанаты музея сілавікі прызналі зброяй.
Warszawa Nasze Miasto піша, што здарэнне адбылося па абедзе 16 лютага. У ДТЗ сутыкнуліся мікрааўтобус, якім кіраваў Лаўрушчык, і грузавік.
У Беларусі ў мужчыны засталася сям’я. Сяргею Лаўрушчыку было 59 гадоў. Цяпер вырашаецца пытанне аб яго пахаванні.
