У мінулым годзе стала вядома пра планы брэсцкіх уладаў пабудаваць новы мікрараён на паўднёвым захадзе горада, уздоўж Варшаўскай шашы. Гэта апошняя адносна вялікая пляцоўка ў Брэсце, дзе магчымая комплексная забудова. Днямі кіраўнік гарвыканкама Аляксандр Рагачук паведаміў, што будаўніцтва пачнецца ўжо сёлета.
Згодна з дэталёвым планам новага мікрараёна, які быў апублікаваны ў ліпені 2021 года на партале Pravo.by, найбольш важным акцэнтам новага мікрараёна з’яўляецца ўезд у Беларусь з боку Польшчы.
Грамадскі цэнтр, школа, пешаходная зона
Там паўстане так званы грамадскі цэнтр з сеткай інвестыцыйных пляцовак, якія дазволяць паступова асвойваць тэрыторыю. Таксама гарадскія ўлады лічаць абавязковым пабудаваць тут высокія будынкі «з мэтай лепшага зрокавага ўспрыняцця сілуэта забудовы».
З абавязковых аб’ектаў у грамадскім цэнтры будзе школа, амфітэатр, шматузроўневы паркінг і пешаходная алея. Магчыма і стварэнне бізнес-цэнтра «Экспа-Брэст».
Асноўным элементам новага раёна будзе бульвар — пешаходны і транспартны, што традыцыйна для горада. Ён павінен візуальна злучыць комплекс царквы ля парка Тысячагоддзя і штык Брэсцкай крэпасці, лічаць аўтары праекта.
Мясцовыя жыхары: калі пустку забудуюць, нарэшце супакояцца моцныя вятры
Жыхары дамоў на прылеглых вуліцах, з якімі паразмаўляў MOST, не бачаць у будоўлі нічога дрэннага. Больш за тое, зараз з пусткі дзьмуць моцныя вятры, якія ствараюць месцічам дыскамфорт. А пасля таго, як яе забудуюць, вятры мусяць стаць спакайнейшымі, кажуць жыхары вуліца Грыбаедава.
