Антываенны пікет правялі ў сераду, 2 сакавіка, беларусы каля Тэрэспаля. Тыя, хто выехаў з радзімы і цяпер жыве ў Польшчы, сабраліся з польскага боку беларуска-польскай мяжы, каб выказаць пазіцыю.
Ініцыятарам акцыі выступіў кіраўнік Народнага антыкрызіснага ўпраўлення Павел Латушка — на акцыі ён казаў пра тое, як беларусы падтрымліваюць украінцаў, і стратэгію НАУ аб міжнародным непрызнанні Лукашэнкі і яго ўрада.
Пачатак мітынгу быў анансаваны на 12 гадзін дня, але многія прыехалі пазней з-за таго, што паліцыя і пагранічнікі выбарачна даглядалі машыны. Некаторыя аўтамабілісты заляпілі чырвона-зялёны сцяжок на беларускіх нумарах бел-чырвона-белым або «Пагоняй». На многіх аўто — украінская сімволіка.
Увесь час людзі прыязджалі і з’язджалі, але заўсёды ўздоўж дарогі ля самага памежнага пераходу заўсёды стаяла як найменей сотня чалавек з плакатамі, бел-чырвона-белымі беларускімі і жоўта-блакітнымі ўкраінскімі сцягамі. Мы паразмаўлялі з удзельнікамі акцыі пра тое, чаму яны прыехалі ў гэты дзень пад Тэрэспаль.
Таццяна з Віцебска
— Хаця б так хочам паўдзельнічаць у тым, каб спыніць тое, што развязалі Пуцін і Лукашэнка. Маральна дапамагчы нашым людзям, якія ў Беларусі. Свет не ўяўляе, што адбываецца ў Беларусі. Усе кажуць: беларусы, выходзьце. Цяпер там нацысцкая Германія 1939 года. Калі ты проста выйшаў на вуліцу і ў цябе ў адзенні нейкае спалучэнне чырвонага з белым, цябе пасадзяць мінімум на 15 сутак. Пасля будзе адміністратыўка і яшчэ можа быць крымінальная справа. Мы выходзім, каб падтрымаць нашых людзей там, каб згуртавацца тут і каб у першую чаргу паказаць Украіне: з чырвона-зялёным сцягам ваююць лукашысты. А бел-чырвона-белы сцяг — гэта нацыянальны сцяг Беларусі і беларусаў, якія іх падтрымліваюць і таксама змагаюцца са зброяй у руках там, ва Украіне.
Яўген з Гродна
— Гэта спосаб сказаць сваё «не» таму, што адбываецца. Акцыя паказвае стаўленне беларусаў да таго, што адбываецца. Многія замежнікі думаюць, што раз беларусы цяпер сядзяць па дамах, то яны гэта падтрымліваюць. Гэта не так. Ад 2020 года большая частка людзей, якія маглі б выйсці на вуліцы, — у турмах ці вымушанай эміграцыі. Тыя, хто застаўся, — напужаныя вялізнымі штрафамі, якія большыя, чым заробкі. Тым, што можна проста за колер шапкі ці шаліка сесці на невядома які тэрмін. Людзей запужваюць выказваць меркаванне гадамі, калі яно адрозніваецца ад меркавання дзяржавы. Але ўсё роўна ў Беларусі выходзяць людзі.
Інга з Мінска
— Я за мір. Хачу паказаць свету, што сапраўдныя беларусы вельмі добра ставяцца да ўкраінцаў. Супраць вайны, супраць рэжыму Лукашэнкі і супраць рэжыму Пуціна. Гэта патрэбна тэрмінова спыніць, гэта не нармальна, каб у XXI стагоддзі адбывалася такое беззаконне і жахлівыя рэчы.
Сцяпан з Мінска
— Я нядаўна ўцёк у Польшчу. Сёння на акцыі, таму што супраць вайны, я за мір. Супраць Лукашэнкі, супраць Пуціна і таго, што прапаганда дурыць людзям мазгі. Гэта, напэўна, самае страшнае. За вайну адказная і прапаганда, яны проста падманваюць людзей.
Павел з Мінска
— Я ўжо год жыву ў Варшаве. Гэта найменшае, што магу зрабіць. Асабліва ўлічваючы, што людзі ў Беларусі выходзілі ў нядзелю і панядзелак, былі затрыманыя. Гэтыя людзі ў значна большай небяспецы, чым я. Адбываецца вайна, і гэта немагчыма проста моўчкі перасядзець. Калі можна зрабіць хоць нешта, то я зраблю хаця б гэта.
Юры з Полацка
— У Польшчы чатыры месяцы. Я супраць вайны і рэжыму Лукашэнкі. І за тое, каб людзі жылі свабодна, мелі сваё меркаванне і сябравалі народамі. Хачу звярнуцца да беларусаў — прашу вас не ісці з вайной. Гэта наш брацкі народ і ў нас няма ніякіх прэтэнзій наогул да ўкраінцаў і ніколі не было. Беларусаў можна падзяліць на дзве часткі — тыя, хто служыць Лукашэнку, ці лукашысты, і звычайныя беларусы. Звычайныя беларусы вельмі добра ставяцца да ўкраінцаў. Гэтыя людзі не будуць ваяваць супраць вас. Я заклікаю салдат складваць зброю.
Павел з Мінска
— Жыву ў Варшаве два тыдні. Я супраць вайны, як і большасць беларусаў. Хачу падтрымаць беларускі і ўкраінскі народы.
Чытайце таксама
Каля польска-беларускай мяжы з боку Тэрэспаля 2 сакавіка адбылася антываенная акцыя беларусаў. Яе арганізаваў кіраўнік Народнага антыкрызіснага ўпраўлення Павел Латушка....
Чытаць далейDetails
Сегодня на польско-беларусской границе возле пограничного пункта «Варшавский мост» проходит антивоенная акция беларусской диаспоры в Польше. Участники акции стоят возле...
Чытаць далейDetails
Владислав Абрамович говорит спокойно и точно — так обычно говорят люди, чьи профессии требуют уверенности рук. Когда-то он оперировал детей...
Чытаць далейDetails
