9 сакавіка польскія памежнікі непадалёк ад польска-беларускай мяжы затрымалі са стральбой грамадзяніна Азербайджана, які перавозіў нелегальных мігрантаў.
Групу нелегальных мігрантаў заўважылі ў адным з памежных гарадоў. Памежнікі пад’ехалі да машыны, аднак кіроўца пачаў уцякаць.
У аўто не паспелі залезці двое чалавек, якія аказаліся грамадзянамі Сірыі. Падчас пагоні кіроўцу занесла, ён урэзаўся ў агароджу сядзібы. У гэты час з машыны выйшлі чацвёра людзей, грамадзяне Сірыі. Кіроўца працягваў уцякаць.
Яго змаглі спыніць толькі на блокпасту, калі памежнік пачаў страляць — аўто ўцякача ўрэзалася ў машыну памежнікаў. Кіроўцам аказаўся грамадзянін Азербайджана. Яму прад’явяць абвінавачванне ў арганізацыі незаконнага перасячэння мяжы для шасці нелегальных мігрантаў. Мужчыну таксама абвінавачваюць у пашкоджанні маёмасці памежнай службы і нападзе на афіцэра ў сувязі з выкананнем службовых абавязкаў. Яму пагражае пазбаўленне волі на тэрмін да 10 гадоў.
