Польская памежная служба сцвярджае, што беларускія службоўцы замінаюць будаўніцтву сцяны на польска-беларускай мяжы. Пра гэта распавяла прэс-сакратарка Памежнай службы Польшчы Анна Міхальска, піша Wyborcza.
Міхальска расказала, што на памежным участку ў Чарэмшы былі разбураныя элементы сцяны — выгнуты так званыя кошыкі ў падмурку, у якія змяшчаюцца слупы сцяны. Побач стаялі будаўнічыя машыны, якія закідалі камянямі, выбілі вокны. Памежная служба ацаніла шкоду ў 30 тысяч злотых.
Прэс-сакратарка Памежнай службы падкрэслівае, што гэта не адзінкавы выпадак. А за такімі інцыдэнтамі, па меркаванні польскіх памежнікаў, стаяць беларускія службы. Па словах Міхальскай, ні адзін з гэтых выпадкаў не паўплываў на тэмпы будаўніцтва сцяны. Яе плануюць закончыць да чэрвеня 2022 года.
