31 сакавіка ў Беластоку пачынае працу турыстычны клуб актыўнага адпачынку «Валацугі».
— Валацугі — гэта слова мае шматзначны сэнс для турыста. Гэта тое, што аб’ядноўвае ўсіх аматараў доўгіх пасядзелак з гучнымі і ціхімі размовамі каля вогнішча пад гукі ракі ці вадаспада, а таксама стогн гітары, — кажуць аўтары турыстычнай ініцыятывы.
У клуб актыўнага адпачынку запрашаюць усіх ахвотных, не зважаючы на ўзрост, узровень фізічнай падрыхтоўкі і турыстычнага досведу, сямейны статус ці нацыянальнасць. Галоўнае, падкрэсліваюць арганізатары клуба, — прага да прыгод ды прыемных цяжкасцей.
Клуб плануе арганізоўваюць турыстычныя маршруты розных узроўняў складанасці: пешыя, водныя, горныя, на роварах, лыжныя і кемпінгавыя, дзіцячыя і дарослыя.
Далучыцца да клуба можна ў тэлеграм-канале «Валацугі/Walacugi».
Мэтамі сваёй дзейнасці аўтары ініцыятывы называюць развіццё сяброўства, папулярызацыю здаровага ладу жыцця, любові да прыроды, а таксама даследаванне навакольнага асяроддзя і выхаванне асабістых якасцей.
