Палітнязволенага Мікалая Аўтуховіча будуць судзіць у гродзенскай турме, паведамляюць праваабаронцы цэнтра «Вясна». Яго будзе судзіць Максім Філатаў, які пакараў Вітольда Ашурка пяццю гадамі зняволення.
Аўтуховіча будуць судзіць не ў Гродзенскім абласным судзе, а ў турме. Таксама змянілася дата пачатку судовага працэсу: яго перанеслі з 16 на 18 мая.
Прадпрымальніка з Ваўкавыска абвінавачваюць па дзесяці артыкулах Крымінальнага кодэкса. Аўтуховіча затрымалі ў снежні 2020 года. Разам з ім затрымалі яшчэ шэраг людзей. Праваабаронцы кажуць, што такіх чалавек як мінімум 12. Беларускія сілавікі лічаць, што Аўтуховіч з’яўляецца арганізатарам і кіраўніком «тэрарыстычнай» ячэйкі, якая падпальвала маёмасць міліцыянераў у Гродзенскай вобласці.
Для Аўтуховіча гэта не першы палітычны пераслед з боку рэжыму Лукашэнкі. У сярэдзіне 2000-х ён балаціраваўся ў дэпутаты, у гэты ж час яго бізнес правяралі сілавікі, у выніку пасадзілі на тры з паловай гады. Пасля таго, як Аўтуховіч выйшаў, праз год яго пасадзілі за «падрыхтоўку тэракту» амаль на пяць гадоў.
Судзіць Аўтуховіча будзе Максім Філатаў. Філатаў не ўпершыню ўдзельнічае ў палітычных судовых працэсах. Ад 2020 года ён вынес пастаноў на больш 12 тысяч рублёў штрафаў, раздаў больш за 90 сутак адміністрацыйнага арышту. Філатаў вядомы і тым, што даў Вітольду Ашурку пяць гадоў зняволення. Нагадаем, Ашурак загінуў у калоніі. Яго родныя абвінавачваюць у гэтым ахоўнікаў калоніі.
