У гродзенскай турме пачаўся працэс па «справе Аўтуховіча». На лаве падсудных — 12 чалавек. MOST расказвае галоўнае, што адбылося ў першы дзень судовага пасяджэння.
Суд зрабілі адкрытым, але на яго пусцілі толькі двух сваякоў абвінавачаных. Працэс асвятляюць дзяржаўныя прапагандысты, называючы падсудных «бандай Аўтуховіча».
У асобных клетках трымалі Мікалая Аўтуховіча і Любоў Рэзановіч, бо, па меркаванні суда, яны «асабліва небяспечныя». Дарэчы, Любоў — жонка праваслаўнага святара Сяргея Рэзановіча, якога таксама затрымалі па гэтай справе.
Мікалай Аўтуховіч хадайнічаў аб змяненні меры ўтрымання для Рэзановіч, але хадайніцтву адмовілі. Суддзю Максіму Філатаву заяўлялі адвод, але ён адмовіў: хадайнічалі Аўтуховіч і Уладзімір Гундар. З цягам часу Гундара і Аўтуховіча выдалілі з залі за «парушэнні парадку». Сёння, дарэчы, іх плануюць вярнуць у залу суда — пра гэтым прасіў дзяржабвінаваўца, пішуць беларускія дзяржСМІ.
Антон Мелхер адмовіўся ад адваката і вырашыў, што будзе абараняцца сам. На лаве падсудных знаходзіцца і яго маці Ірына. Антона абвінавачваюць толькі па адному артыкулу — артыкул 342 Крымінальнага кодэкса («Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх»).
Ці могуць расстраляць Аўтуховіча?
«Наша Ніва» паразмаўляла з юрыстам Паўлам Сапелкам наконт таго, ці магчыма, што суд вынесе расстрэльны прысуд Мікалаю Аўтуховічу.
— Смяротнае пакаранне Мікалаю Аўтуховічу прысудзіць не могуць. Таму што ніхто не загінуў. Былі прынятыя папраўкі, згодна з якімі смяротнае пакаранне магчымае нават у выпадку замаху на здзяйсненне тэракту.
Але Аўтуховіча судзяць яшчэ па старым заканадаўстве, бо яго ўчынкі былі здзейсненыя да ўвядзення паправак. Адпаведна, расстраляць яго не могуць, бо яго дзеянні не пацягнулі гібель людзей.
Каго яшчэ абвінавачваюць па гэтай справе
На лаве падсудных усяго 12 чалавек. Сын Любові і Сяргея Рэзановічаў Павел, пенсіянерка Галіна Дзербыш, актывістка Вольга Маёрава, Ірына Гарачкіна, Віктар Снегур і Павел Сава.
Другі дзень судовага працэсу пройдзе 19 мая.
