«Міністэрства інфармацыі» Беларусі заблакіравала доступ да нашага сайта на тэрыторыі Беларусі. Увечары 30 мая чытачы, якія карыстаюцца інтэрнэтам ад правайдараў ByFly і МТС, паведамілі, што сайт не адкрываецца, а пазней пры адкрыцці старонкі ў Беларусі стала з’яўляцца паведамленне, што доступ да інфармацыйнага рэсурсу абмежаваны.
Прычыну блакіроўкі сайта рэдакцыі не паведамілі. На тэрыторыі Беларусі MOST можна чытаць пры дапамозе VPN. У Польшчы і іншых краінах праблем з адкрыццём сайта MOST не назіраецца.
Раней беларускія «ўлады» прызналі інфармацыйную прадукцыю сайта і некаторых сацыяльных сетак MOST «экстрэмісцкай».
Чаму беларускія «ўлады» блакіруюць сайты незалежных СМІ
За апошнія два гады рэжым Лукашэнкі разграміў амаль усе незалежныя медыя на тэрыторыі Беларусі, якія расказвалі праўду пра фальсіфікацыю вынікаў прэзідэнцкіх выбараў 2020 года і гвалт, які ўчынілі сілавікі ў дачыненні да беларусаў, што выйшлі на пратэсты. Сайты многіх незалежных медыя заблакіраваныя на тэрыторыі Беларусі, а іх журналісты — у вымушанай эміграцыі або ў месцах пазбаўлення волі.
MOST працягвае працу
MOST — гэта каманда беларускіх журналістаў, якія знаходзяцца ў польскім Беластоку, за 50 кіламетраў ад мяжы з Беларуссю. У змушанай эміграцыі мы расказваем пра падзеі, якія адбываюцца на скрыжаванні Беларусі і Польшчы. Палітычныя падзеі ў Беларусі з 2020 года, крызіс з мігрантамі на беларуска-польскай мяжы, вайна ва Украіне аддалілі грамадзянскую супольнасць Польшчы і Беларусі. Мы лічым, што надышоў час будаваць масты паміж дзвюма краінамі, і гэта — наша місія, якой беларускія «ўлады» не змогуць перашкодзіць блакіроўкамі і сумнеўнымі ярлыкамі. Мы імкнёмся ствараць якасны кантэнт пра падзеі па абодва бакі мяжы.
Як чытаць MOST з Беларусі?
Пакуль мы рыхтуем люстэрка, каб вы маглі зручна чытаць MOST на тэрыторыі Беларусі, прапануем уключыць VPN. Можна скарыстацца ўбудаваным у браўзер Opera VPN: стварыце прыватнае акно ў браўзеры (Ctrl+Shift+N), у левым верхнім куце — злева ад адраснага радка — націсніце на кнопку VPN і перасуньце пераключальнік, які ўключае гэтую функцыю.
Таксама вы можаце скарыстацца такімі сервісамі, як UrbanVPN, TunnelBear і добра знаёмы беларусам пасля 2020 года Psiphon. Гэтыя дадаткі можна ўсталяваць як на камп’ютар, так і на смартфон.
Дзякуй, што застаяцеся з намі. Мы цэнім.
