Клуб аматараў грамадскага транспарту Беластока збіраецца адрамантаваць адзіны на Падляшшы аўтобус «Ікарус». Клуб просіць дапамогі, а таксама абяцае паказваць увесь рамонтны працэс.
Ikarus 280.26 быў класічным аўтобусам для грамадскіх перавозак на вуліцах польскіх гарадоў падчас савецкага рэжыму. Аўтобус, які цяпер рамантуюць у Беластоку, выкарыстоўваўся раней аўтобусным паркам у Чэнстахове.
Клуб аматараў грамадскага транспарту Беластока атрымаў гэты аўтобус у 2016 годзе пасля шматгадовых перамоў з аўтобусным паркам Чэнстаховы. Аднак з-за недахопу сродкаў часова «замарозілі» рамонтныя працы, толькі набывалі камплектуючыя.
Цяпер аматары збіраюць 20 тысяч злотых, але, па іх словах, гэта толькі «верхавіна айсбергу».
Ikarus — венгерская марка аўтобусаў. Такія аўтобусы былі папулярным відам грамадскага транспарту і ў БССР. Гэтыя аўтобусы з’явіліся ў Савецкай Беларусі яшчэ напачатку 1960-х гадоў і на некаторых маршрутах працавалі ажно да канца 2010-х.
