Генеральная пракуратура Беларусі на прыкладах расказала, якія тавары пры ўездзе ў Беларусь будуць адносіць да катэгорыі «для асабістага карыстання», а якія — не. Пра гэта паведамляе партал S13.
Генеральная пракуратура падкрэслівае, што калі чалавек думае, што рэччу можна карыстацца ў быту, то гэта не заўсёды значыць, што гэта «рэч для асабістага карыстання». У беларускім ведамстве спасылаюцца на рашэнне савета Еўразійскай эканамічнай камісіі, у якім прапісаны спіс тавараў, што не адносяцца да тавараў асабістага карыстання.
За парушэнне фізічным асобам пагражае штраф ад 5 да 30 базавых велічынь (ад 160 да 960 рублёў на 15 чэрвеня 2022 года). Гаворка ў гэтым выпадку ідзе пра недэклараванне чалавекам тавараў.
Прыклад №1. Мужчына вёз у Беларусь з Польшчы новы кацёл цэнтральнага ацяплення. Яго ён не дэклараваў. На думку беларускіх мытнікаў, мужчына парушыў частку 1 артыкула 15.5 КаАП. Суд прызначыў пакаранне ў памеры 10 базавых велічынь.
Прыклад №2. Грамадзянін Украіны ехаў да сваяка ў Беларусь, каб «дапамагчы з рамонтам, і вёз з сабой пліткарэзны станок і тарцавальную пілу». У ведамстве ўдакладняюць, што гэтыя рэчы былі ў мужчыны даўно, аднак беларускі суд усё роўна прызначыў пакаранне ў памеры 10 базавых велічынь.
