18 чалавек абвінавачваюць у кантрабандзе праз зачынены прапускны пункт на польска-беларускай мяжы «Палаўцы» (у Беларусі — «Пясчатка»). Васьмёра з іх раней працавалі ў мытнай службе Падляшша. Пра гэта паведамляе Radio Białystok.
Пракурор Анджэй Бура з Акруговай пракуратуры ў Беластоку расказаў, што па справе аб кантрабандзе на польска-беларускай мяжы праходзяць 18 чалавек. Восем чалавек з абвінавачваных раней былі супрацоўнікамі мытнай службы Падляскага ваяводства. Злачынная група дзейнічала са жніўня 2017 года па май 2018 года.
Абвінавачваныя, па версіі следства, забяспечвалі транспарціроўку і далейшы продаж тавараў, якія яны ў 2017-2018 гадах атрымлівалі праз памежны пункт пропуску «Палаўцы — Пясчатка» (цяпер зачынены з-за міграцыйнага крызісу). Злачынцы абвінавачваюцца ў дачы і атрыманні хабару, невыкананні службовых абавязкаў.
Групай кіравалі два чалавекі — грамадзянін Польшчы і грамадзянін Беларусі. Абвінавачваным пагражае да 10 гадоў пазбаўлення волі. Большасць абвінавачваных не прызнаюць сябе вінаватымі — толькі адзін чалавек прызнаў віну па прад’яўленым абвінавачванні, яшчэ адзін — часткова.
Разгляд справы ў судзе пачнецца ў верасні.
