У канцы чэрвеня рэдакцыя MOST прапанавала чытачам пагуляць па Беластоку і адшукаць усе восем скульптур мядзведзікаў. Ганна Зубрыцкая была першай, хто сабраў міні-мядзведзікаў у розных месцах Беластока. Ад нашай рэдакцыі беларуска атрымала падарунак — кнігу Руслана Кулевіча з успамінамі гродзенскіх старажылаў.
Ганна родам з Росі і толькі два тыдні жыве ў Беластоку. Каб бліжэй пазнаёміцца з горадам, яна вырашыла паўдзельнічаць у конкурсе. На пошук мядзведзікаў Ганна патраціла два дні.
— Я ўбачыла ў тэлеграме навіну і вырашала пашукаць гэтых мядзведзікаў. Нават не думала, што буду першай, хто збярэ з чытачоў. Усё было амаль у цэнтры. Гэтыя скульптуркі — сапраўдныя арыенціры цікавых аб’ектаў у Беластоку. Дзякуючы ім я пазнала Беласток. Больш за ўсё запомніўся мядзведзік з чэрапам. Не ведаю яго гісторыю, але цікава было б даведацца. Фантазія аўтара ўражвае, — распавяла Ганна.
Нагадаем, восем скульптур мядзведзікаў з’явіліся ў Беластоку ў 2021 годзе дзякуючы беларусу Лукашу Леанюку. Праект увасобіў мастак Даміян Куцаба з Кракава.
Восем мядзведзікаў Беластока
1. Мішка Блюзмэн / Miś Bluesman
2. Мішка Гетманова / Miś Hetmanowa
3. Мішка Урсідо / Miś Ursido
4. Мішка, які штурхае мячык / Miś z Kulą
5. Мішка Студэнт / Miś Student
6. Мішка святы Мікалай / Miś św. Mikołaj
7. Мішка Гетман / Miś Hetman
8. Мішка Акцёр / Miś Aktor
