9 жніўня ў MediaPortBelarus у Беластоку пачала працу фотавыстава «Кожны дзень. Супраціў у беларускіх рэгіёнах». MOST патрапіў на адкрыццё і паказвае, што можна пабачыць на выставе.
Пра што выстава
Кожны дзень беларускага супраціву ад 2020 года адначасова падобны і не падобны на іншыя, але іх яднае, што людзі знаходзяць спосабы паказаць пратэст у самых небяспечных умовах, адзначаюць арганізатары.
— Мы хочам паказаць самыя яркія фотаздымкі з розных гарадоў Беларусі. Такім чынам мы скіроўваем увагу на тое, што перамен чакалі не толькі ў Мінску, але і ў самых маленькіх населеных пунктах. Мы паказваем, якой цаной беларусы расплачваюцца за свой супраціў, — кажа арганізатарка выставы Зоя Хруцкая.
На выставе можна пабачыць здымкі давыбарнага перыяду з чэргаў на подпісы за кандыдатаў у прэзідэнты і дазволеных мітынгаў, фота за 9 жніўня і падзей, што адбываліся пасля ў той жнівень.
Што было на адкрыцці
На выставе выступілі гродзенскі журналіст Руслан Кулевіч, маладзечанская фотажурналістка Настасся Уткіна і краязнаўца Кастусь Шыталь. Яны расказалі пра свае працы падчас пратэстаў у Беларусі. Кастусь Шыталь расказаў пра фотаработы Зміцера Лупача ў Глыбокім і Шаркаўшчыне.
На выставе прадстаўленыя фотаздымкі з Брэста, Гродна, Маладзечна, Шаркаўшчыны, Глыбокага, Бабруйска, Чачэрска, Ганцавічаў.
Арганізатары паведамляюць, што да выставы могуць далучыцца і іншыя фотажурналісты з рэгіёнаў.
