Мурал з «Дыджэямі перамен», які стаў сімвалам Плошчы Перамен у Мінску, з’явіўся 16 верасня ў Беластоку.
Малюнак стварылі ў дворыку па вуліцы Сянкевіча ў Беластоку, побач з прасторай MediaPortBelarus. Аўтар працы — мінскі дызайнер Сяргей Стальмакоў.
— Усё пачалося са старой лавачкі. Прыйшла думка аднавіць і пафарбаваць яе ў бел-чырвона-белыя колеры. А пусты ўчастак сцяны за лавай натхніў мяне на думку ўзнавіць адзін з нашых пратэсных муралаў 2020 года. А адзным з самых першых і значных малюнкаў беларускага пратэсту з’яўляецца мурал «Дыджэі перамен». Ён вельмі арганічна ўпісаўся ў адведзенай яму прасторы. Цяпер у Беластоку з’явілася месца для беларусаў, дзе можна ўспомніць пачуццё салідарнасці і яднання, — расказаў MOST Сяргей Стальмакоў.
Упершыню мурал «Дыджэі перамен» з’явіўся 18 жніўня 2020 года ў адным з самых пратэсных двароў Мінска. Графіці на трансфарматарнай будцы — два дыджэя, Кірыл Галанаў і Уладзіслаў Сакалоўскі, якія ўключылі на адным з праўладных мерапрыемстваў песню Віктара Цоя «Перамен», за што трапілі за краты. Пасля вызвалення маладыя людзі пераехалі ў Літву. На працягу жніўня і восені 2020 года выяву, якая стала адным з сімвалаў пратэсту, знішчалі і аднаўлялі больш за 20 разоў.
