У Беластоку з’явіцца вуліца Вольнай Беларусі замест часткі Электрычнай, ад Варшаўскай да Браніцкага. Адпаведнае рашэнне большасцю галасоў прыняла гарадская рада 27 верасня. 18 радных прагаласавалі за, тры — супраць, яшчэ сем устрымаліся. Таксама было прынятае рашэнне аб наданні кругавой развязцы назвы Вольнай Украіны.
Ля беларускага консульства на вуліцы Электрычнай беларуская дыяспара Беластока рэгулярна ладзіць акцыі пратэсту супраць рэжыму Лукашэнкі. Актыў беларускай дыяспары Беластока пракаментаваў навіну:
— Вельмі добрая навіна аб з’яўленні ў Беластоку вуліцы Вольнай Беларусі. Менавіта тут, пачынаючы з лета 2020 года і дагэтуль, беларусы збіраюцца, каб выказаць сваё абурэнне фальсіфікацыяй выбараў, міліцэйскім гвалтам, беззаконнем, рэпрэсіямі, каб выказаць салідарнасць з тымі, хто змагаецца за свабоду Беларусі, з палітвязнямі.
«Мы вельмі ўдзячныя ўладам Беластока за падтрымку і салідарнасць! Мы ўпэўненыя, што прыйдзе час, і на вуліцы Вольнай Беларусі будзе консульства не лукашэнкаўскай, а Вольнай Беларусі».
У пачатку сакавіка 2022 года Павел Латушка прапанаваў прэзідэнту Беластока перайменаваць вуліцу Электрычную ў вуліцу Вольнай Беларусі. На гэтую прапанову звярнулі ўвагу многія медыя. Пазней гэтае пытанне Павел Латушка зноў узняў падчас сустрэч у Беластоку ў ліпені.
Прэзідэнт Беластока Тадэвуш Трускаляскі падтрымаў прапанову кіраўніка Народнага антыкрызіснага ўпраўлення ініцыяваць перайменаванне вуліцы Электрычнай, дзе знаходзіцца Генеральнае консульства Беларусі ў Беластоку.
«Перайменаванне вуліцы Электрычнай у вуліцу Вольнай Беларусі — гэта жэст падтрымкі і павагі беларусам, якія змагаюцца за свабоду. У турмах рэжыму Лукашэнкі знаходзяцца больш за 1 300 палітычных зняволеных, у тым ліку актывіст Саюза палякаў у Беларусі Анджэй Пачобут», — падкрэслівалася ў абгрунтаванні праекта.
— Змена назвы вуліцы Электрычнай, дзе размешчаны будынак Генеральнага консульства Беларусі ў Беластоку, на вуліцу Вольнай Беларусі, і прысваенне кругавой развязцы назвы Вольнай Украіны з’яўляецца важным жэстам падтрымкі, таму што сёння на нашых вачах адбываюцца гістарычныя падзеі, звязаныя з барацьбой двух народаў за сваю дзяржаўнасць і нават за сваё права на існаванне.
Сімвалізм гэтага рашэння звязаны з тым, што без незалежнай Украіны практычна немагчыма ўявіць сабе незалежную і свабодную Беларусь, — адзначыў Павел Латушка.
