Беларускія памежнікі знайшлі на мяжы з Польшчай труп мужчыны — пра гэта паведамляе Дзяржаўны памежны камітэт. Хутчэй за ўсё, гэта мігрант, які хацеў нелегальна перайсці беларуска-польскую мяжу.
У прэс-рэлізе беларускае ведамства называе памерлага «бежанцам». Паводле паведамлення, цела памежнікі знайшлі 2 кастрычніка непадалёк ад брамкі ў польскай загародзе. На целе не было вопраткі, непадалёк ляжалі асабістыя рэчы. Для высвятлення абставінаў і прычын смерці памежнікі выклікалі на месца следча-аператыўную групу.
Польская памежная служба таксама пракаментавала выпадак з памерлым. Прэс-служба паведаміла, што заўважыла на беларускім баку чалавека яшчэ 1 кастрычніка, пасля чаго гэту інфармацыю перадалі беларускім памежнікам. Польскі бок сцвярджае, што беларускія службы адрэагавалі занадта позна і прыехалі разам з тэлебачаннем.
Штурм беларуска-польскай мяжы з боку мігрантаў з краін Блізкага Усходу і Афрыкі працягваецца. Польскія службы паведамляюць, што беларускі бок арганізоўвае незаконнае перасячэнне польскай мяжы. Мігрантаў падвозяць да мяжы, паказваюць месцы перасячэння, інструктуюць, дапамагаюць пераадольваць натуральныя перашкоды, такія як поймы або балоты.
