У Варшаве праходзіць выстава фотаздымкаў дзяцей і моладзі з Беларусі і Украіны, якія маюць досвед вымушанай міграцыі.
Адкрыццё выставы адбылося на мінулым тыдні ў варшаўскай галерэі Яблкоўскіх.
Выстава праходзіць у межах адукацыйнага New Home Project, у якім фатаграфія і арт-тэрапія сустрэліся, каб дапамагчы дзецям і моладзі з Беларусі і Украіны перапрацаваць досвед міграцыі і падзяліцца ім адно з адным, а таксама з усімі, хто мае патрэбу.
Некалькі месяцаў каманда праекта праводзіла ў Варшаве заняткі з дзецьмі і маладымі людзьмі, чые сем’і вымушана пакінулі родную краіну. Украінцаў з дома выгнала вайна, а беларусаў — рэпрэсіі і палітычны ціск, якімі ўлада помсціць за пратэсты 2020 года.
— На жаль, 24 лютага для многіх украінцаў і палякаў беларусы перасталі быць палітычнымі ўцекачамі. Цяпер яны грамадзяне краіны, з тэрыторыі якой на Кіеў ляцяць ракеты. Мы, беларуская частка каманды New Home Project, ганарымся, што ў ім удзельнічаюць беларусы і беларускі, чые семʼі заплацілі высокую цану за жаданне жыць у краіне, якая не бамбардзіруе суседзяў. Магчымасць гаварыць аб гэтым досведзе для нас — легалізацыя агульнай траўмы, сеанс псіхатэрапіі і ўрок па гісторыі сучаснай Беларусі, — распавядае пра выставу фатографка і заснавальніца New Home Project Юлія Шаблоўская.
Мэта праекта New Home Project — стварыць бяспечную прастору, дзе можна смела гаварыць пра пачуцці, перажыванні і страхі. Каманда верыць, што тэрапеўтычны эфект, які нясе ў сабе фатаграфія, дапаможа прыняць і палюбіць месца, дзе многія ўдзельнікі выставы апынуліся вымушана, знайсці тут новых сяброў і распавесці сваю гісторыю тым, каго гэта можа натхніць на пошукі свайго новага дома.
Некаторыя фатаграфіі, што ўвайшлі ў выставу, зробленыя яшчэ да вайны. Самаму малодшаму ўдзельніку выставы — 5 гадоў, старэйшаму — 23.
Instagram — @newhome.project, шукаць фота праз тэгі #newhomeproject і #домтамгдея
Кантакты: newhome.project.photo@gmail.com, тэлефон (заснавальніца праекта Юлія Шаблоўская) — 502-637-394.
