Ідэя такіх заняткаў прыйшла групе беларусаў — аматарам традыцыйных беларускіх танцаў, якія цяпер жывуць у польскім горадзе. Першая сустрэча пройдзе ў хабе «Новая зямля» 19 лютага.
Танцавальная супольнасць задумвалася як месца, куды беларусы могуць прыйсці ажыць, дадаць жыцця ў сваё жыццё, калі ім няпроста ў іншай краіне, распавядае Марыся — адна з арганізатарак танцаў у Беластоку.
— Наконт моманту, ці можна танцаваць падчас вайны, падчас таго, як людзі пакутуюць у турмах, я сабе адказала: можна. Пра гэта пішуць і самі вязьні ў лістах, просяць нас, на свабодзе, жыць і радавацца па магчымасці, не адкладаць сваё жыццё. У папярэднюю сусветную вайну людзі таксама танцавалі. Для мяне танцы — спосаб падтрымаць сябе, захаваць сябе, дапамагчы сабе не звар’яцець, — кажа Марыся.
Арганізатарка распавядае, што да таго ж, танцы — гэта спосаб праводзіць час з аднадумцамі, спосаб камунікацыі, якой часта не хапае беларусам у Польшчы. Мову танца могуць зразумець людзі, якія гавораць на розных мовах.
— Танцаваць беларускія танцы — гэта спосаб захаваць беларускую культуру ў іншай краіне. Спосаб застацца сабой. Спосаб адкрываць сваё нават за мяжой. Дзяліцца сваім досведам, каб усё больш людзей яе ведалі і любілі.
Танцы будуць праходзіць у хабе «Новая зямля» кожны тыдзень. За музыку адказны дудар Мікола. Арганізатары працягваюць шукаць музыкаў, якія ўмеюць граць традыцыйныя беларускія танцы, або якія граюць на традыцыйных інструмэнтах (скрыпцы, гармоніку, дудзе, бубне) і здольныя хутка навучыца граць танцы.
— Хаб «Новая зямля» — гэта беларуская пляцоўка. Там досыць шмат прасторы, каб танцаваць. Гаспадары ахвотна пагадзіліся нас прыняць, дзякуй ім за адкрытасць да беларускіх ініцыятываў, мы вельмі рады, што такая пляцоўка ёсць у Беластоку. На жаль, не драўляная падлога, якая лепш для танцаў. Калі пацяплее, магчыма, мы будзем танцаваць на адкрытым паветры, недзе ў парку, — дадала Марыся.
Калі: 19 лютага
Дзе: Беларускі хаб «Новая Зямля» (Stefana Wyszyńskiego 6A)
Час: 17:00-19:00
Уваход: вольны, ахвяраванні вітаюцца.
