24 лютага 2023 года спаўняецца роўна год з моманту поўнамаштабнага нападу Расіі на Украіну. За гэты перыяд Польшча дапамагла больш мільёну ўцекачаў, а таксама тым, хто змагаецца за незалежнасць Украіны. У гадавіну поўнамаштабнай вайны ўлады Беластока клічуць жыхароў горада на вялікі мітынг.
Мітынг пад назвай «Разам супраць расійскай агрэсіі» пройдзе 24 лютага а 18:00 перад помнікам маршалу Юзафу Пілсудскаму на плошчы Касцюшкі. Улады Беластока клічуць на мерапрыемства жыхароў Беластока, каб скарыстацца выпадкам і праявіць салідарнасць з украінскім і беларускім народамі.
— Сустрэнемся ў пятніцу ў сімвалічным месцы ў Беластоку, перад помнікам маршалу Пілсудскаму. Давайце будзем разам з грамадзянамі як Украіны, так і Беларусі, народ якой таксама прыгнечаны пуцінскай Расіяй. Давайце пакажам нашу падтрымку ўсім тым, хто хоча жыць у свабодных, дэмакратычных, незалежных дзяржавах, — сказаў на прэс-канферэнцыі намеснік прэзідэнта Беластока Пшэмыслаў Тухлінскі.
