Зварот перадалі ў канцэлярыю Анджэя Дуды 15 сакавіка. Мэта звароту — пачаць вызваляць беларускіх палітвязняў спачатку па спісе. Аўтары мяркуюць, што гэты спіс «мусіць пачынацца з лідараў беларускай апазіцыі і грамадзянскай супольнасці», паведамляе «Позірк».
Пералічаныя палітвязні Алесь Бяляцкі, Анджэй Пачобут, Статкевіч, Севярынец, Рыгор Кастусёў, Мікалай Казлоў, Яўген Афнагель, Генадзь Драздоў, Максім Вінярскі i Генадзь Фядыніч.
Акрамя таго, яны прапануюць дадаць у спіс жанчын, журналістаў, праваабаронцаў, дзеячаў культуры, пенсіянераў, палітвязняў з інваліднасцю і захворваннямі, непаўнагадовых. «Адмова афіцыйнага Мінска вызваліць гэтых палітвязняў мусіць прывесці да жорсткіх санкцый», — гаворыцца ў звароце.
— Мы лічым, што рэжым Лукашэнкі пад ціскам увядзення дадатковых санкцый мусіць пачаць ініцыяваць працэс сканчэння палітыкі тэрору і рэпрэсіяў у дачыненні да беларускага народу, — кажа сустаршыня Руху Салідарнасці «Разам» Алена Талстая.
Па стане на 16 сакавіка ў Беларусі прызнаныя палітычнымі вязнямі 1463 чалавекі.
