Беларусы Труймяста і Памор’я ў 105-ю гадавіну стварэння БНР адкрылі другую кампанію матэрыяльнай дапамогі нашым ваярам ва Украіне. MOST паразмаўляў з адным з прадстаўнікоў дыяспары Гданьску.
— Мяне завуць Міхаіл, я з’яўляюся актывістам дыяспары беларусаў Труймяста. Я не належу ні да ніякай палітычнай групы ці структуры, ніякім афіцыйным прадстаўніком не з’яўляюся, проста адзін з тых, хто арганізуе, прасоўвае і каардынуе гэты збор.
«Беларусы замежжа павінны быць падтрымкай»
Міхаіл адзначыў, што сэнс кампаніі палягае ў тым, каб сабраць грошы і набыць аўтамабілі для байцоў Палка Каліноўскага.
— Нашыя суайчыннікі, беларусы, ваююць на баку Украіны, абараняюць гонар і волю не толькі Беларусі, але і ўкраінцаў, і ўсёй Еўропы, усяго вольнага свету. На вайне ўсе рэсурсы страчаюцца вельмі хутка, заўсёды павінен працаваць тыл, які забяспечвае паспяховую дзейнасць ваяроў усiм неабходным.
Міхаіл падкрэсліў, што ў дыяспары ёсць моцнае разуменне таго, што беларусы замежжа павінны быць падтрымкай для беларускіх дабраахвотнікаў ва Украіне.
«Замест спрэчак паміж сабой — дапаможам нашым ваярам»
Першы збор грошаў быў адкрыты восенню 2022 года. Была знойдзена машына пад патрэбы Палка — Volkswagen T4. Машына была перададзена прадстаўнікам Палка ў Варшаве 14 лютага і накіравана ва Украіну.
— Гэтая кампанія ўжо другая, якую мы ладзім. У нас ужо ёсць першая паспяховая кампанія, закрылі яе ў лютым, яна цягнулася тры месяцы. Цяпер машына выконвае баявыя задачы, і мы лічым гэта нашай паспяховай падтрымкай, — кажа адзін з арганізатараў збора Міхаіл. — Тады мы згуртаваліся, таму што, ведаеце, беларусы любяць час ад часу ўстроіць канапавыя войны паміж сабой у інтэрнэце, інакш вядомыя як «бульбасрачы». Гэтыя спрэчкі амаль заўсёды нічога не прыносяць, акрамя негатыву і страчанага часу.
Пасля спрэчак і ўзнікла прапанова па дапамозе беларускім ваярам ва Украіне. Было вырашана, што машына – гэта самае каштоўнае і самае патрэбнае, што дыяспара можа прадаставіць.
— Так атрымалася, што мы сабралі цягам трох месяцаў грошы, але ў выніку, калі мы знайшлі машыну і даслалі, то ў нас засталася рэшта. Вырашылі правесці яшчэ раз такую кампанію, але паставілі мэту трошкі складаней: не адну машыну набыць, а дзве.
Вайна — рэсурсаёмкая справа
Дыяспара беларусаў Труймяста лічыць нашых дабраахвотнікаў, якія змагаюцца на баку Украіны «элітай нашай нацыі і мы бачым тое, што сваёй дзейнасцю, мужнасцю яны ствараюць сапраўдны падмурак беларускага нацыянальнага войска, якое будзе сапраўды стаяць на абароне незалежнасці нашай краіны».
— Яны ўжо цягам года вельмі дакладна дэкларуюць, што і навошта яны робяць. Мы гэтыя ідэі падтрымліваем і бачым сваю ролю тут у тым, каб аказваць ім матэрыяльную і рэсурсную дапамогу. Вайна — гэта вельмі рэсурсаёмкая справа. І каб нашы ваяры эфектыўна выконвалі свае баявыя задачы і як мага больш з іх не страціла сваё жыццё, а захавала яго, мы патрэбны забяспечваць ім моцны тыл, каб яны маглі выконваць свае задачы. Адзін з пунктаў эфектыўнага выканання імі баявых задач — гэта звычайны грузавы транспарт. Наша мэта — падтрымаць нашых мужных ваяроў моцным тылам, прадаставіўшы ім вось гэтыя машыны, якія яны патрабуюць для эфектыўнага выканання сваіх баявых задач.
Чым дапамагчы і куды пойдуць грошы
Міхаіл кажа, што, па-першае, трэба азнаёміцца і даведацца пра такую ініцыятыву і па магчымасці ахвяраваць на збор. Па-другое — расказаць пра збор знаёмым і сябрам, каб яны таксама заданацілі. Мужчына кажа, што збор пазіцыяніруецца як збор ад беларусаў Труймяста і Памор’я, але арганізатары заклікаюць прыняць у ім усіх ахвотных.
— Фронт існуе дзякуючы таму, што ёсць тыл, які забяспечвае паспяховую дзейнасць ваяроў усім неабходным. Калі мы марым аб вольнай і незалежнай Беларусі, то і тыл нашых жаўнераў павінен быць наймацнейшым, а тыл — гэта кожны вольны беларус за мяжой. Моцны тыл — гэта мы з вамі!
На дадзены момант сабрана трохі больш за 10 тысяч злотых. Мэта кампаніі — 50 тысяч злотых. Грошы пойдуць менавіта для аўтамабіляў Volkswagen Т4.
Заданаціць зараз на другі збор: https://zrzutka.pl/ez8kju
Першы збор — паспяхова зачынены: https://t.me/trgrdze/2295/6203
Справаздача з Першага збору: https://drive.google.com/file/d/1hXGm44c74qm8zavU74tqyFTxzauLKOTT/view
Чаму VW T4 (BalaganOFF): https://t.me/balaganoffnews/12564
Падзяка ад ПКК: https://kalinouski.org/news/news-2023-03-06-2359/
Падзяка ад батальёна Волат: https://t.me/trgrdze/6506
