Па вуліцах Варшавы 16 красавіка прайшоў XVI Катынскі марш ценяў. Яго ўдзельнікі такім чынам аддаюць даніну памяці польскім грамадзянам, забітым у Катынскім лесе пад Смаленскам у 1940 годзе. У мерапрыемстве рэканструктараў у польскай сталіцы прынялі ўдзел і беларусы.
Для ўдзелу ў маршы з розных куткоў Польшчы прыехалі каля 250 рэканструктараў. Яны прайшлі па вуліцах польскай сталіцы ў даваеннай форме Войска польскага, Корпуса аховы памежжа і Дзяржаўнай паліцыі, жанчыны — у адзенні той эпохі. Штогадовы марш у Варшаве — гэта даніна памяці забітых у Катыні, ушанаванне памяці амаль 22 тысяч польскіх грамадзян, забітых савецкім НКВД вясной 1940 года. Падчас маршу зачытваліся лісты з лагераў да сем’яў, імёны загінулых, у тым ліку і духавенства.
Узгадаліся адразу словы з ліста камандзіра Віленскай брыгады кавалерыі Войска Польскага Канстанціна Друцкага-Любецкага: «Мы змагаліся супраць немцаў, а трапілі ў савецкі палон». Прадстаўніка знакамітага рода з Новага Поля растралялі пад Кіевам… а колькі польскіх вайскоўцаў, паліцыянтаў, прадстаўнікоў цывільнай адміністрацыі трапілі ў так званы «Беларускі катынскі спіс» — тысячы. І пра іх трагедыю трэба памятаць не толькі палякам, але і беларусам, — распавёў на сваёй старонцы ў Facebook гісторык Ігар Мельнікаў.
У «Беларускім катынскім спісе» паводле розных дадзеных магло быць каля 4 тысяч чалавек. Гэта грамадзяне Польшчы, якія жылі да пачатку Другой сусветнай вайны на сучаснай тэрыторыі Заходняй Беларусі. Да сённяшняга дня невядома, дзе пахаваныя гэтыя людзі. Яны былі ахвярамі сталінскіх злачынстваў.
