Ягор, Даша і двухгадовы Гедымін пераехалі ў Польшчу ў студзені бягучага года. Сям’я абрала Беласток, каб Гедымін меў магчымасць наведваць дзіцячы садок з беларускай мовай навучання. Самаідэнтыфікацыя сына для іх перадусім. MOST пагутарыў з маладымі бацькамі пра ідэю стварэння брэнда і планы на будучыню.
Як з’явілася ідэя стварыць брэнд дзіцячага адзення?
— Ідэя ўзнікла месяцаў дзесяць таму, калі мы яшчэ жылі ў Батумі. Яна будавалася на тым, што ёсць пэўная колькасць беларускіх брэндаў адзення для дарослых, а для дзяцей няма амаль нічога цікавага і нацыянальна арыентаванага. Калі пачалі праглядаць прапановы, знайшлі толькі цішоткі з прынтамі. Не бралі ў разлік тыя беларускія брэнды, якія грунтаваліся не на беларускай мове.
Да пэўнага часу ідэя была адкладзена ў шуфлядку, бо на той момант мы знаходзіліся ў актыўнай фазе падрыхтоўкі да пераезду ў Польшчу: займаліся візамі, набывалі квіткі і актыўна назапашвалі грошы. Перабраўшыся ў Польшчу, у першыя месяцы часу на рэалізацыю ідэі таксама не было, бо шукалі кватэру, намагаліся ўладкаваць Гедыміна ў садок і праходзілі адаптацыю.
У адзін красавіцкі вечар, стоячы на балконе, мы вярнуліся да размовы пра стварэнне брэнда адзення. Абмеркавалі некаторыя нюансы, злавілі дзэн і раніцай наступнага дня пачалі рабіць першыя крокі.
Чаму брэнд назвалі Hiedymin?
— Назва брэнда — імя нашага сына, напісанае беларускай лацінкай. Іншых варыянтаў назвы не было, бо мы хацелі падкрэсліць сувязь брэнда з сынам, які стаў нашым галоўным натхненнем і тварам сямейнага бізнесу.
Акрамя гэтага, Гедымін — гэта і вялікі князь літоўскі. Князі — адна з самых славутых старонак нашай гісторыі, але, на жаль, далёкая ад масавага разумення беларусамі, у адрозненне, напрыклад, ад паўстання Каліноўскага ці Тадэвуша Касцюшкі.
У будучыні плануем будаваць канцэпт, у тым ліку, на ідэі вялікіх князёў.
Якая асноўная місія брэнда?
— Місія — дапамагчы маленькім беларусам і беларускам культурна не згубіцца ў краінах, у якіх яны вымушана апынуліся з бацькамі. Усе гэтыя дзеці, як і наш сын, будуць у гэтых краінах сталець, вучыць іх мовы і гісторыю, пераймаць каштоўнасці і погляды, каб грамадства іх прыняло. Але праз культурныя коды мы зможам дапамагаць дзецям памятаць, хто яны.
Наш брэнд будзе імкнуцца рабіць штосьці, што дапаможа захаваць беларускасць у нашых дзецях на адлегласці. Каб яны ў будучыні змаглі пабудаваць лепшую краіну ў Еўропе — нашу Беларусь.
Як ствараўся лагатып?
— Пагоня — гэта тое, вакол чаго мусіць будавацца ўсё ў дэмакратычнай Беларусі. Восем стагоддзяў Пагоня прысутнічала на гербах дзяржаў, якія існавалі на тэрыторыі Беларусі.
Хлопчык на кані з мячом — гэта вобраз дзіцяці (як хлопчыка, так і дзяўчынкі), якое цікавіцца гісторыяй і пераймае вобраз літоўскіх ваяроў.
Чырвоны і блакітны колеры — колеры Беларусі. Чырвоны колер заўжды прысутнічаў на геральдыцы дзяржаў, якія існавалі на нашай тэрыторыі. І на радавых гербах шляхты. Блакітны колер — колер азёраў і рэк, якіх шмат на нашай зямлі.
Акрамя гэтага, як на лагатыпе, так і на цэтліках, упакоўцы і часткова ў Instagram мы выкарыстоўваем лацінскі алфавіт. Такім чынам хочам падкрэсліць большую набліжанасць нашай гісторыі да еўрапейскай.
Што зараз у вас можна набыць і колькі гэта каштуе?
— Зараз у продажы ёсць камплект «Вершнік». Ён складаецца з трох пазіцый: світшота, саколкі і шортаў. На світшоце і саколцы ў зоне сэрца залатымі ніткамі вышыты вершнік.
Склад світшота і шортаў: 94% — бавоўна, 6% — эластан. Склад саколкі: 100% — бавоўна.
Кожная рэч камплекта зроблена з даволі шчыльнага матэрыялу (280 г/м²), але пры гэтым адзенне добра прапускае паветра і не скоўвае рух дзіцяці.
Камплекты прадстаўлены ў чорным і бэжавым колерах на выбар.
Зараз мы працуем па перадзамове: збіраем пэўную колькасць замоў і перадаём на вытворчасць. Тэрмін вытворчасці — да 14 дзён. Арыенціровачна перадзамова будзе працягвацца да 3 ліпеня. Кошт камплекта — 535 злотых (€120). Але да 29 чэрвеня ўключна камплект можна набыць за 445 злотых (€100).
Сваю замову можна пакінуць у нашым Instagram: запоўніць форму па спасылцы ў шапцы профілю ці напісаць нам у дырэкт.
Для дзяцей якога ўзросту ваша адзенне?
— Камплект, які мы запусцілі ў продаж, мае шэраг памераў ад 98 да 140 см. Гэта ўзрост дзяцей ад 2 да 10 гадоў.
Камплекты ідуць памер у памер. Зараз Гедымін носіць адзенне на рост 104 сантыметры, яго рост — 100 сантыметраў, узрост — 2 гады 10 месяцаў. Мы прымяралі на яго камплекты на рост 110 сантыметраў (4 гады), і яны таксама вельмі добра выглядалі: быў эфект лёгкага оверсайзу. Таму, фактычна, камплекты падыдуць на дзяцей ад 1-1,5 года.
У перспектыве плануем рабіць адзенне і для больш дарослых дзяцей — да 17 гадоў.
Адзенне вашага брэнда можна набыць толькі ў Польшчы?
— Не, мы прадугледзелі дастаўку па ўсім свеце. Таму замовіць камплект можна ў любую кропку. Тэрмін дастаўкі будзем абмяркоўваць з бацькамі індывідуальна і абіраць найбольш зручны для іх.
Дастаўка па Польшчы — бясплатная. Будзе ажыццяўляцца праз паштовую службу InPost. Тэрмін дастаўкі — 1-2 працоўных дні.
Што тычыцца дастаўкі ў Беларусь, то мы прынялі нялёгкае рашэнне часова не дастаўляць адзенне на Радзіму. Гэта абумоўлена, у першую чаргу, небяспекай для бацькоў і дзяцей. Паколькі HIEDYMIN — брэнд нацыянальна арыентаванага адзення, на рэчах адлюстроўваюцца і будуць адлюстроўвацца нацыянальныя сімвалы, гістарычныя асобы і г. д., і пакуль існуе хаця б маленечкі намёк на небяспеку для пакупнікоў, продажы ў Беларусі немагчымыя. Дастаўкі ў Расію няма.
Ці плануеце выпускаць яшчэ нешта акрамя камплектаў «Вершнік»?
— Так, ідэй для рэалізацыі вельмі шмат, дзякуючы нашай вялікай культуры і гісторыі. А каб не прапусціць навінкі, раім падпісацца на наш Instagram і сачыць.
