Тыдзень беларускага тэатра пройдзе ў Тэатры экстрады TR Warszawa з 8 па 13 жніўня. У мерапрыемстве прымуць удзел калектыў «Купалаўцы», Team theatre, Brave banda, Diafilm live. Гледачы ўбачаць сем спектакляў і шоў у выкананні артыстаў з Беларусі і Украіны.
У TR Warszawa распавялі, што спектаклі, якія можна ўбачыць падчас беларускага тэатральнага тыдня, закранаюць «шырока зразумелыя грамадска-палітычныя тэмы, апавяданні пра жыццё пры дыктатуры ў Беларусі і падчас вайны ва Украіне і асабістыя гісторыі пра прымусовую эміграцыю і спробу стварыць новы дом за мяжой».
Усе падзеі будуць забяспечаныя польскімі субтытрамі, каб зрабіць іх даступнымі для польскай аўдыторыі.
«На жаль, пасля выбуху 2020 года беларускі тэатр стаў прадметам жорсткіх рэпрэсій з боку дыктатуры Лукашэнкі, як і іншыя інстытуты грамадзянскай супольнасці. Пад ціскам улады многім тэатральным людзям давялося пакінуць краіну, ратуючы сваю свабоду, а часам і сваё жыццё. Большасць з іх пасяліліся ў Польшчы, і тут дзякуючы падтрымцы польскіх і замежных устаноў яны працягваюць сваю мастацкую дзейнасць», — сцвярджае куратар тыдня беларускага тэатра Раман Паўлоўскі.
Ён кажа, што тыдзень будзе першай шырокай прэзентацыяй сучасных артыстаў з Беларусі за апошнія гады.
«У праграме — прэм’еры новых спектакляў, пастаўленых у Варшаве, а таксама новыя версіі спектакляў, пастаўленых у Беларусі і прывезеных у Польшчу літаральна “у чамадане” і памяці стваральнікаў. Сярод іх будуць пастаноўкі найноўшай беларускай драматургіі, якія паказваюць жыцьцё ва ўмовах дыктатуры ў Беларусі і вайны ва Украіне, дакумэнтальныя фільмы, а таксама спэктаклі, якія звяртаюцца да старых палескіх традыцый ці легенд Паўночнай Эўропы», — піша Паўлоўскі.
