Дакументальная стужка «Радзіма» беларускіх рэжысёраў Аляксандра Міхалковіча і Ганны Бадзяка атрымала ўзнагароду на XV кінафестывалі ў Гдыні. Пра гэта піша Reform.by.
Фільм пра гвалт у войску атрымаў прыз у міжнароднай секцыі дакументальнага кіно. Журы падкрэсліла, што ён распавядае пра маральную эрозію людзей, якія апынуліся ў пастцы таталітарызму.
У кіно распавядаецца пра маці, якая страціла сына, калі ён служыў у войску. Яго знайшлі мёртвым. Пакуль Святлана спрабуе праліць святло на культуру гвалту і здзекаў у беларускіх Узброеных сілах, групе маладых сяброў з тэхна-андэграўнду неўзабаве самім пагражае прызыў у войска.
Тэлеканал «Белсат» раней адзначаў, што стужка належыць да вытворчасці Швецыі, Украіны і Нарвегіі. Аднак рэжысёры — беларусы. Ганна Бадзяка і Аляксандр Міхалковіч у 2018 годзе разам знялі таксама дакументальны фільм «Мая бабуля з Марсу», у якой распавядалася пра жыццё бабулі Аляксандра Міхалковіча ў Крыму пасля 2014 году.
Стужка сёлета ўжо была адзначана на міжнародных фестывалях, а таксама вылучана на прэмію Еўрапейскай акадэміі.
