Беларусы, якія ў гэтым годзе будуць падаваць падатковыя дэкларацыі ў Польшчы і Літве, змогуць накіраваць частку сваіх падаткаў на беларускія ініцыятывы. Платформа «Новая Беларусь» абвясціла пра старт новага праекта па лічбавым самакіраванні «Будуй сваё».
У Польшчы на абраныя ініцыятывы можна накіраваць 1,5% падатку (партнёры ў гэтай краіне — фундацыі Tutaka і FaniMani), а ў Літве — 1,2% (арганізацыя ZUBR.IN).
Летась да праекта далучылася як мінімум 265 удзельнікаў (дакладная колькасць невядомая, бо частка людзей фундавала партнёрам адсотак падаткаў, але не дасылала скрын дэкларацыі). Так было сабрана каля 47 тыс. еўра. На гэтыя сродкі ў Літве ўжо запусцілі бібліятэку беларускай кнігі, а ў Польшчы ствараюць сайт па сапраўднай гісторыі Беларусі.
Першая спроба аказалася ўдалай, але выявіла і недахопы, якія абяцаюць выправіць у гэтым годзе.
— Мы атрымалі фідбэк, што людзям не падабаецца фундаваць грошы на невядомыя ідэі. Таму ў гэтым годзе прыём ідэй стартуе неўзабаве пасля старту прыёму фундушаў, — адзначылі ў «Новай Беларусі».
Акрамя таго, стала зразумела, што не ва ўсіх, хто прапануе добрыя ідэі, ёсць досвед запуску праектаў. Таму ў гэтым годзе платформа плануе запусціць навучальны блок пра рэалізацыю ідэй.
Таксама высветлілася, што нацыянальныя праекты гатовыя падтрымаць і беларусы ў іншых краінах, дзе няма магчымасці пералічыць сродкі праз падатковыя дэкларацыі. У такіх людзей таксама з’явіцца магчымасць паўдзельнічаць — праз унёсак ад 35 еўра.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
