Ініцыятыва «БНР100» ладзіць вялікае анлайн-мерапрыемства да Дня Волі — 106-й гадавіны абвяшчэння незалежнасці Беларускай народнай рэспублікі. Трансляцыя ўжо запланаваная на YouTube-канале «Годна», яна пачнецца 25 сакавіка а 19:00 па Мінску (17.00 па Варшаве).
Анлайн-святкаванне будзе складацца з двух блокаў: музычнага і інфармацыйнага. На мерапрыемстве выступяць вядомыя беларускія гурты, якія рэдка можна ўбачыць на адной сцэне:
- J:МОРС
- NAVIBAND
- DLINA VOLNY
- DZIECIUKI
- NOCHY
- VOLSKI
Весці анлайн-мерапрыемства будуць Ліза Ветрава, прадстаўніца каманды «Годна» і папулярная беларуская блогерка, і Дзяніс Дудзінскі — тэлевядоўца і шоўмен.
— Уявіце, што гэты дзень — як Дзень народзінаў нашай Радзімы, Беларусі, толькі ёй, вядома, не 100 гадоў, а значна больш. Збірайце сяброў і блізкіх за святочным сталом, сустракайцеся разам у файнай кампаніі ды ўключайце эфір, які дазволіць вам правесці вечар у коле беларусаў і беларусак пад прыемную музыку ды цікавыя размовы, — заклікаюць арганізатары.
Уся асноўная інфармацыя — па хэштэгу #БНР106 і на сайце BNR106.info. Таксама можна падтрымаць збор на арганізацыю святкавання. Сродкі пойдуць на арэнду тэхнічнага абсталявання, пляцоўкі, працу тэхнічнай каманды ды арганізацыю выступаў.
