У метро Варшавы на вялікіх рэкламных экранах з’явіліся электронныя выявы пра сітуацыю ў Беларусі. На іх напісана, як простыя для кожнага паляка справы могуць апынуцца палітычным пераследам у Беларусі.
«Пакінуў каментар на Фэйсбуку? У Польшчы твой каментар — гэта ўклад у дыскусію. У Беларусі можаш трапіць у турму», — сцвярджаецца на адным з іх.
«У Польшчы твае дабрачынныя ахвяраванні — гэта дапамога тым, хто ў іх мае патрэбу. У Беларусі гэта падстава завесці справу», — інфармуе іншы. Тут жа расказваецца пра Андрэя Савінскага, асуджанага на пяць гадоў знаволення за данат у 50 долараў.
«Вывучэнне замежнай мовы ў Польшчы — гэта тваё развіццё. У Беларусі закрылі 10 школ і курсаў польскай мовы», — паведамляе трэці.
Таксама палякам нагадалі пра лёс журналіста Анджэя Пачобута, які быў голасам палякаў у Беларусі.
Такім чынам улады польскай сталіцы выказалі салідарнасць з беларускім народам і нагадалі жыхарам горада пра рэпрэсіі ў Беларусі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
