Беларусы Польшчы адзначаюць Дзень Волі. Фотарэпартаж

25 сакавіка беларусы адзначаюць Дзень Волі. 106 гадоў таму была абвешчана незалежнасць Беларускай народнай рэспублікі. Афіцыйныя мерапрыемствы ў гэты дзень можна правесці толькі за мяжой. Паколькі свята выпала на панядзелак, частка ўрачыстасцей адбылася напярэдадні — 24 сакавіка.

У Варшаве беларусы сабраліся а 14.00 на плошчы Trzech Krzyży і прайшлі маршам да плошчы Plac Zamkowy, дзе зладзілі святочны канцэрт.

День Воли в Варшаве — Святкаванне Дня Волі ў Варшаве. 24 сакавіка 2024 года. Фота: Л.С. / MOST

У Беластоку дзень распачаўся з малітвы за беларускі народ, а завяршыўся канцэртам-імпрэзай на галоўнай плошчы горада.

Як адзначыла вядучая канцэрта, музыка Кацярына Ваданосава, сёлетняе свята хацелася разнастаіць і выйсці са звыклага фармату мітынгу. Таму пасля афіцыйнай часткі на сцэну выйшлі музыкі. Пад песні Ігара Палынскага ўдзельнікі свята парэфлексавалі наконт мінулага, а разам з гуртом «Курвадзікі» ўсміхнуліся і пераканаліся: усё будзе добра.

Святкаванне Дня волі будзе адбывацца ў Беластоку і ў панядзелак, 25 сакавіка. У планах арганізатараў — сімвалічны забег, а таксама канцэрт ад Classic-modern orchestra пад кіраўніцтвам дырыжора Паўла Котлі.