25 сакавіка, у трэцюю гадавіну затрымання польскага журналіста Анджэя Пачобута, у Беластоку правялі мітынг у ягоную падтрымку. У мерапрыемстве прыняў удзел ваявода Падляскага ваяводства Яцак Бжазоўскі.
«Я схіляю галаву перад усімі тымі, хто патрабуе, крычыць і заклікае вызваліць усіх палітычных зняволеных у Беларусі. Анджэй Пачобут — гэта сімвал барацьбы за свабоду, дэмакратыю і правы чалавека», — сказаў Яцак Бжазоўскі.
Дэпутаты мясцовага савета заклікалі беларускія ўлады вызваліць Пачобута, а ўрад Польшчы і іншых краін ЕС — актывізаваць дзеянні ў гэтым кірунку.
У горадзе абнавілі плакаты, якія маюць на мэце нагадваць жыхарам пра палякаў, якія знаходзяцца ў зняволенні ў Беларусі «за польскасць».
Анджэй Пачобут быў затрыманы 25 сакавіка 2021 года ў сваім доме ў Гродне пасля ператрусу. З тых часоў застаецца ў зняволенні. Беларуская пракуратура абвінаваціла гродзенскага журналіста ў распальванні нацыянальнай варожасці, рэабілітацыі нацызму і закліках да санкцый. 8 лютага 2023 года палітзняволенаму Анджэю Пачобуту далі 8 гадоў калоніі.
Па стане на 26 сакавіка ў Беларусі прызнаныя палітычнымі вязнямі 1407 чалавек.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
