Беларусы запусцілі мабільную аплікацыю для знаёмстваў «Віт!» Яна ўбачыла свет 7 жніўня і ўжо атрымала пазітыўныя водгукі карыстальнікаў.
Стваральнікі прылады расказваюць, што яе ідэя нарадзілася на пачатку 2024 года, калі ў СМІ актыўна абмяркоўвалася патрэба ў «беларускім Ціндары». Праца пачалася ў сярэдзіне красавіка, і праз тры з паловай месяцы аплікацыя была гатовая.
Бэта-тэставанне праводзілася як сярод беларусаў у Беларусі, так і сярод дыяспары. Падчас яго аўтары атрымалі шмат водгукаў і пажаданняў, якія былі ўлічаныя пры распрацоўцы канчатковай версіі. Яна даступная для iOS і Android.
Рамантычныя знаёмствы — не адзіная мэта аплікацыі. Членам дыяспары яна дапамагае пазнаёміцца з суседзямі-суайчыннікамі. Тут таксама можна знайсці сяброў для дзіцяці, кампанію для сумесных актыўнасцяў ці кампаньёнаў для практыкі беларускай мовы.
Акрамя знаёмстваў, аплікацыя прапануе і іншыя магчымасці, напрыклад у ёй можна знайсці мапу ўстаноў, дзе дакладна абслужаць па-беларуску. Стваральнікі абяцаюць, што з цягам часу мапа будзе пашырацца.
«Беларусы вартыя быць мэтавай аўдыторыяй»
Інтэрфейс аплікацыі цалкам на беларускай мове. Стваральнікі тлумачаць гэта тым, што «беларусы вартыя таго, каб для іх стваралася праграмнае забеспячэнне» і каб яны былі «мэтавай аўдыторыяй, нягледзячы на маленькі рынак і іншыя адгаворкі». Распрацоўшчыкі абапіраліся і на ўласны досвед жыцця за мяжой: ведалі, як прыемна сустрэць там земляка.
Доступ да ўсіх функцый у «Віт!» бясплатны, у тым ліку да тых, якія ў іншых прыладах часта лічацца прэміяльнымі. А мадэль манетызацыі заснавана на ахвяраваннях і падпісках. Аднаразовы ўнёсак складае 1 еўра, а падпіска — 0,5 еўра. Таксама стваральнікі заклікаюць рэкламадаўцаў, напрыклад беларускамоўныя ўстановы.
Галоўная задача праекта зараз — набраць аўдыторыю.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
