19 кастрычніка ў Варшаве пройдзе трэці Кубак Івуліна. Гэта аматарскі турнір па футболе сярод беларусаў у эміграцыі. Турнір праходзіць у знак салідарнасці з беларускімі палітвязнямі і першапачаткова быў названы ў гонар журналіста Аляксандра Івуліна.
Першы такі турнір прайшоў у 2022 годзе ў Варшаве. Тады ў мерапрыемствы ўзялі ўдзел 16 каманд, сфармаваных з беларусаў замежжа. У 2023 годзе ўжо ўдзельнічала 40 каманд, дадаліся таксама ўкраінскія дружыны.
Сёлета арганізатары турніра паведамляюць, што Кубак Івуліна пройдзе ў падобным фармаце. У Кубку возьме ўдзел і былы палітвязень Аляксандр Івулін. Ён выйшаў на волю ў лютым 2023 года. За кратамі журналіст «Трыбуны» правёў 624 дні.
— У 2022 годзе хлопцы арганізавалі гэты турнір у знак салідарнасці са мной і тысячамі іншых палітвязняў, якія апынуліся ў беларускіх турмах ні за што. Год таму «Саша выйшаў», але колькасць палітвязняў не паменшылася. Зараз людзей пачалі выпускаць па памілаваннях, але ў цэлым сітуацыя не мяняецца. У Беларусі па-ранейшаму мінімум 1320 палітвязняў. І калі ў 2022 годзе, знаходзячыся за дротам, я стаў чэмпіёнам калоніі па міні-футболе, то цяпер «жоўтабірачным» забаронена нават набліжацца да пляцоўкі. Таму мы будзем гуляць за іх. Гучыць пафасна, але, калі знаходзішся там, неверагодна прыемна атрымліваць весткі, што пра цябе памятаюць тут, — напісаў Івулін на сваёй старонцы ў Instagram.
Зарэгістраваць сваю каманду на турнір можна па спасылцы. Унёсак за каманду 300 злотых.
