Карэнныя беларусы Польшчы сустракаюць Шчодры вечар — Новы год па Юліянскім календары. Свята дагэтуль вельмі распаўсюджана ва ўсходніх рэгіёнах, асабліва на Падляшшы, дзе спрадвеку жывуць беларусы.
У гэты дзень прынята збірацца ўсёй сям’ёй на святочную вячэру. На стале звычайна кішка, кашанка ці іншыя каўбасы, а таксама перогі — польскія варэнікі. Карэнныя беларусы адзначаюць, што, каб і год быў шчодры, стол мусіць быць багатым, з вялікай колькасцю страў.
Для тых, хто не плануе адзначаць свята дома, рэстараны, кавярні і гатэлі робяць спецыяльныя святочныя прапановы.
Вітаюцца ў гэты дзень фразай «Добры вечар! Шчодры вечар!»
Цікава, што ў Падляскім ваяводстве легальна выкарыстоўваць піратэхнічныя вырабы можна не толькі ў ноч з 31 снежня на 1 студзеня, але і з 13 на 14 студзеня.
У рэгіёнах яшчэ памятаюць традыцыі Шчодрага вечара. Напрыклад, такі жарт, як здыманне варот і хаванне іх ад гаспадароў. Лічыцца, што гэта дазваляла пазбегнуць руціны і ўнесці жарт і гульню ў штодзённае жыццё. Гаспадары, каб вярнуць вароты, часта вымушаны запрасіць жартаўнікоў на частаванне ці падарыць пачастункі. Яшчэ адзін жартаўлівы звычай — зацягнуць санкі на дрэва або дах.
Увечары 13 студзеня беларусы Польшчы віншуюць сваіх блізкіх, сяброў, суседзяў. На Radio Białystok да самай ночы ідзе святочная трансляцыя па-беларуску, падчас якой жыхары могуць перадаць пажаданні тым, хто знаходзіцца далёка.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
