Польскія каталіцкія біскупы прызначылі ксяндза Лешэка Крыжу каардынатарам душпастырства для беларусаў. Святар будзе апекавацца супольнасцямі беларусаў-каталікоў, якія цяпер існуюць у васьмі гарадах Польшчы, паведамляе Каталіцкае інфармацыйнае агенцтва.
Апека над беларусамі стане для ксяндза Лешэка Крыжы дадаткам да яго абавязкаў дырэктара Офіса групы дапамогі Касцёлу на Усходзе.
— На карце Касцёла ў нашай краіне з’яўляецца ўсё больш цэнтраў душпастырства іншаземцаў. Мы ўжо маем цэнтры, якія служаць людзям, якія карыстаюцца англійскай, французскай, іспанскай, в’етнамскай, італьянскай, украінскай і беларускай мовамі. Душпастырства на беларускай мове ўпісваецца ў гэты прыгожы спектр разнастайнасці Касцёла, — кажа ксёндз Лешэк Крыжа.
Святар збіраецца наведаць у бліжэйшы час усе беларускія супольнасці, каб азнаёміцца з сітуацыяй і «даведацца як пра радасці, так і пра цяжкасці беларусаў».
— Адным з выклікаў, з якім [беларусы] могуць сутыкацца, з’яўляецца абмежаваная магчымасць выезду ў Беларусь і наведвання родных, якія там засталіся. Многія з іх не могуць вярнуцца ў сваю краіну. Менавіта таму душпастырства на беларускай мове мае для іх асаблівае значэнне: яны могуць сустрэць у ім людзей з падобным досведам, разам перажываць свае клопаты і ўзаемна ўмацоўваць сябе, — сказаў ксёндз.
Пасля пачатку масавай эміграцыі з Беларусі першыя набажэнствы па-беларуску пачаліся ў Варшаве пры касцёле святога Аляксандра. Цяпер у Польшчы існуюць дзевяць супольнасцяў беларусаў-каталікоў: дзве ў Варшаве, па адной у Беластоку, Гданьску, Кракаве, Лодзі, Любліне, Познані, Уроцлаве. Расклады набажэнстваў і навіны з іх жыцця публікуюцца на адмысловым сайце.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
