28 чэрвеня ў Варшаве пройдзе чацвёрты Кубак Івуліна. Гэта аматарскі турнір па футболе сярод беларусаў у эміграцыі. Турнір праходзіць у знак салідарнасці з беларускімі палітвязнямі і першапачаткова быў названы ў гонар журналіста Аляксандра Івуліна.
Сёлета ў турніры плануецца ўдзел больш за двадцаці каманд. Зарэгістравацца можна па спасылцы. Унёсак за каманду 300 злотых. Усе сабраныя сродкі пойдуць на арганізацыю турніру і дапамогу палітвязням.
— У 2022 годзе хлопцы арганізавалі гэты турнір у знак салідарнасці са мной і тысячамі іншых палітвязняў, якія апынуліся ў беларускіх турмах ні за што. «Саша выйшаў» даволі даўно, але за кратамі застаюцца больш за 1200 палітзняволенных. Каля 3000 «жоўтабірачных» ужо цалкам адбылі тэрміны, але турма не заканчваецца пасля вызвалення. Траўмы, флэшбэкі, ціск – усё гэта накатвае і «пасля званка», – распавёў Аляксандр Івулін у сваім Instagram.
Першы такі турнір прайшоў у 2022 годзе ў Варшаве. Тады ў мерапрыемствы ўзялі ўдзел 16 каманд, сфармаваных з беларусаў замежжа. У 2023 годзе ўжо ўдзельнічала 40 каманд, дадаліся таксама ўкраінскія дружыны. У 2024 годзе прынялі ўдзел 24 дружыны.
Сёлета арганізатары турніра паведамляюць, што Кубак Івуліна пройдзе ў падобным фармаце. У Кубку возьме ўдзел і былы палітвязень Аляксандр Івулін. Ён выйшаў на волю ў лютым 2023 года. За кратамі журналіст «Трыбуны» правёў 624 дні.
