Ганна (імя змененае) паехала ў Славенію і спынілася ў хостэле, дзе аказаліся клапы. Яны так моцна пакусалі дзяўчыну, што ёй прыйшлося звярнуцца па медыцынскую дапамогу. Але плаціць за лячэнне не спатрэбілася, бо ў яе была картка медыцынскага страхавання (EKUZ), аформленая ў Польшчы. Сваім вопытам Ганна падзялілася з MOST.
Хостэл у Любляне быў даволі танным, але Ганна ўжо ночыла там летась — і тады ўсё прайшло без эксцэсаў. Ёй спадабалася, і яна нават паставіла гэтаму месцу адзнаку «9» на Букінгу. І абрала яго зноў.
— А сёлета мяне там пакусалі, падобна, спачатку мошкі, а потым клапы. Пачалася моцная алергічная рэакцыя з апуханнем месцаў укусаў. Раней мяне ўжо кусалі клапы ў гатэлях — і такой рэакцыі не было, толькі свярбела. Я моцна спужалася, нагугліўшы, што апуханне вуснаў можа сведчыць пра развіццё анафілактычнага шоку, і вырашыла ехаць у шпіталь.
«Размова была толькі пра маё здароўе»
Асобнай страхоўкі для вандроўкі па Славеніі ў Ганны не было. Зараз яна жыве ў Польшчы і працуе ў гэтай краіне па дамове падраду (umowa zlecenie). Працадаўца робіць за яе адлічэнні ў польскі адпаведнік беларускага Фонду сацыяльнай аховы насельніцтва — ZUS. Такім чынам дзяўчына мае медыцынскую страхоўку ў Польшчы. Але такая страхоўка дазваляе зрабіць картку EKUZ (Europejska Karta Ubezpieczenia Zdrowotnego), якая забяспечвае доступ да экстранных медыцынскіх паслуг у іншых краінах Еўрасаюза.
З гэтай карткай Гання звярнулася ў найбліжэйшую бальніцу, якая працуе ўначы.
— У прыёмным пакоі паказала сваю картку EKUZ і від на жыхарства ў Польшчы. Гэтых дакументаў было дастаткова, нават пашпарт, здаецца, не прасілі, — успамінае беларуска. — Размова была толькі пра маё здароўе. Запыталі, што здарылася, памералі ціск, сатурацыю, зрабілі ЭКГ. Пасля гэтага зрабілі ўкол і далі таблетку. Потым трэба было каля гадзіны знаходзіцца ў шпіталі пад наглядам і яшчэ пару гадзін чакаць афармлення дакументаў. Я нічога не плаціла. Мне выпісалі рэцэпт на антыгістаміны (супрацьалергічныя лекі. — Заўв. MOST) і паведамілі, што прэпарат трэба прымаць 10 дзён.
Па лекі можна было звярнуцца ў любую аптэку. Там Ганне іх далі бясплатна, толькі адсканаваўшы картку EKUZ.
— Як я разумею, рахункі за зварот у шпіталь і за таблеткі выслалі ў польскі NFZ (Нацыянальны фонд здароўя. —Заўв. MOST).
Што такое картка EKUZ і як яе аформіць
EKUZ (Europejska Karta Ubezpieczenia Zdrowotnego) забяспечвае тым, хто мае дзяржаўную медстрахоўку ў адной з краін Еўрасаюза, доступ да экстранных медычных паслуг у іншых краінах ЕС на тых жа ўмовах, што і жыхарам гэтых краін.
Калі ў краіне, па якой вандруе турыст, яму патрэбна выклікаць хуткую дапамогу і ў гэтай краіне яна прыязджае бясплатна, то ўладальнік EKUZ таксама нічога не плаціць. Калі медыцынская дапамога — напрыклад прыём у доктара — прадугледжвае частковую аплату для грамадзян гэтай краіны, то і ўладальніку карткі таксама давядзецца даплаціць.
Па EKUZ нельга праходзіць планавае лячэнне. Да таго ж у некаторых краінах EKUZ не дзейнічае ў выпадку заняткаў экстрэмальнымі відамі спорту — трэба купляць дадатковую страхоўку.
За межамі Еўрасаюза EKUZ дзейнічае таксама ў Ісландыі, Ліхтэнштэйне, Нарвегіі, Швейцарыі, але толькі калі ўладальнік карткі — грамадзянін адной з краін ЕС.
EKUZ афармляецца бясплатна. Калі звярнуцца ў ваяводскі аддзел NFZ (адрасы можна паглядзець тут), то картку можна атрымаць на месцы па жывой чарзе. Трэба толькі запоўніць заяву і паказаць дакумент, які сведчыць асобу. Заяўку на афармленне EKUZ можна падаць у электронным выглядзе праз сэрвісы ePUAP альбо Internetowe Konto Pacjenta, а таксама выслаць у ваяводскія аддзелы NFZ па электроннай альбо звычайнай пошце. Тады заяўкі разглядаюцца некалькі дзён (да пяці, але ў сезон адпачынкаў даўжэй). Гатовую картку EKUZ можна забраць у адпаведным ваяводскім аддзеле NFZ альбо выбраць опцыю, каб яе выслалі поштай.
EKUZ выдаюць на тры гады тым, хто аформлены па працоўнай дамове (umowa o pracę). Уладальнікі дамовы падраду (umowa zlecenie) атрымаюць картку толькі на паўгода. Студэнтам і вучням дадуць EKUZ на паўтара года, зарэгістраваным як беспрацоўныя — на два месяцы, а пенсіянерам — адразу на 20 гадоў.
Картка дзейнічае, пакуль яе ўладальнік застрахаваны ў NFZ. Калі права на дзяржстрахоўку страчваецца, то, нягледзячы на дату, пазначаную на пластыкавай картцы EKUZ, яна не дзейнічае. Калі дзяржстрахоўка аднаўляецца пасля перапынку, пластыкавую картку EKUZ мяняць не трэба, пакуль не скончыцца тэрмін яе дзеяння (яна не прывязаная да пэўнага працадаўцы).
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
