Беларуская футбольная каманда «Пагоня», створаная эмігрантамі ў Варшаве, пасля двух гадоў чакання атрымала дазвол выступаць у польскім чэмпіянаце.
«Пагоня» стала першай беларускай футбольнай камандай, якой дазволілі ўдзел у чэмпіянаце Польшчы. Раней клуб гуляў толькі ў Кубку Польшчы і на аматарскіх турнірах, дзе няма абмежаванняў на колькасць гульцоў без грамадзянства Еўрасаюза. Каб трапіць у лігу, беларусам давялося прайсці складаную працэдуру рэгістрацыі і дабіцца выключэння з правіл, якія абмяжоўваюць колькасць замежнікаў.
Паводле польскага футбольнага рэгламенту, у кожнай камандзе (акрамя Экстракласы) на полі могуць знаходзіцца не больш за трох гульцоў з краін, што не ўваходзяць у ЕС. Пасля 2022 года гэтае правіла было змякчана толькі для ўкраінцаў.
Паколькі амаль уся «Пагоня» складаецца з грамадзян Беларусі, клуб доўгі час не мог атрымаць дазвол на ўдзел у лізе. Кіраўніцтва каманды адмовілася мяняць канцэпцыю і запрашаць польскіх ці ўкраінскіх гульцоў, падкрэсліўшы, што хоча заставацца сапраўднай беларускай камандай.
Восенню 2025 года Мазавецкі футбольны саюз (MZPN) ухваліў удзел «Пагоні» ў лізе і дазволіў фарміраваць склад выключна з беларускіх гульцоў. Пазней гэтае рашэнне пацвердзіў і Польскі футбольны саюз (PZPN), афіцыйна адкрыўшы камандзе шлях у польскую сістэму спаборніцтваў.
— Для нас гэта вялікая радасць і паказчык для ўсіх беларусаў, што, нягледзячы на ўсе абставіны і на бюракратыю, у Польшчы можна дасягаць пазітыўных вынікаў. Канешне, удзел у лізе — гэта большая адказнасць перад заўзятарамі, перад камандай, перад сапернікамі і федэрацыяй, але гэта тыя выклікі, з якімі мы з задавальненнем будзем спраўляцца ды ісці наперад, бо найбольшая перашкода на нашым шляху ўжо пройдзеная, — распавёў MOST адзін з заснавальнікаў клуба Алесь Лагвінец.
Беларускі клуб дэбютуе ў B-класе, якая лічыцца восьмым узроўнем польскага чэмпіянату. «Пагоні» трэба будзе дагуляць шэсць перанесеных матчаў сезона. Польскія сапернікі ўжо выказалі гатоўнасць сустрэцца з беларусамі і падтрымалі іх удзел у лізе.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
