Першага верасня ўрок для старшакласнікаў усіх школ і студэнтаў ВНУ Беларусі праходзіў пад назвай «Гістарычная памяць — дарога ў будучыню». Яго правёў для старшакласнікаў Лукашэнка. У сваім «лікбезе» ён закрануў тэму этнічных беларусаў, якія жывуць на Падляшшы, назваўшы іх праваслаўнымі палякамі. Пісьменнік з Падляшша Міхась Андрасюк пракаментаваў для MOST гэтае выказванне.
Вось што казаў Лукашэнка падчас свайго выступу:
— У Рэчы Паспалітай, калі б не яе падзелы, нас чакаў нацыянальны крах. У лепшым выпадку мы б сёння называлі сябе праваслаўнымі палякамі, як дзясяткі тысяч сучасных жыхароў Беласточчыны, — сказаў Лукашэнка.
У Падляскім ваяводстве, паводле перапісу насельніцтва 2011 года, жыло больш за 40 тысяч этнічных беларусаў. Многія з этнічных беларусаў жывуць сёння ў Беластоку.
Пісьменнік і журналіст Міхась Андрасюк усё жыццё жыве на Падляшшы, называе сябе беларусам. Лукашэнку ён вырашыў адказаць прыкладам са свайго жыцця:
— Сёння ў маладым пакаленні на Падляшшы вельмі папулярна называць сябе праваслаўным палякам. Ідзе змешванне канфесіі з нацыяй. Я б Лукашэнку сказаў бы так: «Калі б гэты дзядзька не быў бы ў Беларусі, то ў нас не было б праваслаўных палякаў. У нас былі б беларусы, калі б была нармальная Беларусь».
Бо ў пачатку 90-х гадоў, калі з’явілася незалежная дзяржава Беларусь, у нас маладыя людзі натоўпамі ехалі ў Гродна, Мінск, каб вучыцца ў ВНУ. Мой сын здаў экзамен у гродзенскі ўніверсітэт, гэта было ўжо пры Лукашэнку. Сын быў прыняты на англійскую філалогію. Прыехаў у Гродна, тры дні прабыў у Беларусі і кажа: «Навошта ты мне намаўляў вывучаць беларускую мову? Я пабыў у Гродне, там не чую беларускага слова. Там ва ўніверсітэце ўсё па-руску. А я рускую не вывучаў, я там не змагу вучыцца». І вось гэта адказ Лукашэнку. Каб не ён, то не было б праваслаўных палякаў. Маладыя беларусы з Падляшша ехалі б у Беларусь, на новую зямлю, у новы свет, каб яны бачылі, што нараджаецца краіна — іх краіна, краіна іх продкаў. А тое, што зрабіў Лукашэнка, — ён забіў гэтую краіну і зрабіў з беларусаў Падляшша праваслаўных палякаў.
