Беларускія аматары бегу ў Варшаве амаль за суткі на карце польскай сталіцы намалявалі Пагоню. Для гэтага ім трэба было прабегчы 221 кіламетр.
Ідэя такога забегу з’явілася ў аматараў бегу з Беларусі, якія жывуць у Варшаве. За падрыхтоўку і рэалізацыю ўзяўся Вадзім Сіманаў, які яшчэ ў Беларусі рабіў з дапамогай прабежак падобныя малюнкі. Вадзім — з Мінска. У сталіцы ён быў каардынатарам спартыўных мерапрыемстваў і арганізатарам забегаў. Свой першы малюнак бегам ён зрабіў у 2017 годзе. З канца 2020 года Вадзім стаў рабіць малюнкі на пратэсную тэматыку.
У красавіку 2022 года Вадзім вымушаны быў з’ехаць з Беларусі ў Польшчу. У польскай сталіцы ён далучыўся да мясцовага клуба аматараў бегу run_wawa_run, у які ўваходзілі беларусы.
— Калі збег з Беларусі, пазнаёміўся з беларускімі аматарамі бегу ў Варшаве. — расказвае Вадзім. — Яны пра мае прабежкі ведалі і прапанавалі таксама нешта намаляваць у польскай сталіцы. Так з’явілася ідэя з Пагоняй. Хацелі нешта маштабнае і тэматычнае зрабіць. Тут шмат тых, хто з’ехаў праз пераслед, як і я, таму пратэсная тэматыка актуальная. А Пагоня — гэта прыгожы, складаны і вельмі сімвалічны малюнак для нас.
Каб зрабіць на карце польскай сталіцы такі малюнак, трэба прабегчы 221 кіламетр. Для гэта было абрана 12 этапаў, у якіх узялі ўдзел 13 чалавек. Вадзім для сябе абраў самы складаны этап і прабег амаль 65 кіламетраў.
— Людзі хутка сабраліся. Сабе ўзяў першы кавалак — на ўсю ноч. Пагоню ў Варшаве было складана намаляваць, бо ў Мінску я мог бегаць як хачу сам, а тут — строга па дарожках і без парушэння ПДД. Я заўсёды на тэлефоне гляджу і магу сам карэктаваць свой бег, а астатнім складана. Але ў выніку зрабілі, трохі паправілі — і атрымалася Пагоня. На гэта нам спатрэбілася 26 гадзін.
