Кіраўнік Народнага антыкрызіснага ўпраўлення, прадстаўнік Аб’яднанага пераходнага кабінета па транзіце ўлады, а раней — пасол Беларусі ў Польшчы і Францыі, міністр культуры Беларусі і кіраўнік Купалаўскага тэатра Павел Латушка ў калонцы для MOST разважае, чаму Лукашэнка пачаў заігрываць з Кітаем.
Навошта дыктатар едзе да старшыні КНР
Лукашэнка зразумеў, што доўга сядзець у шпагаце паміж Масквой і Бруселем стала для яго небяспечна. Таму ён пачаў стукацца ў дзверы Паднябеснай, якая, на яго думку, можа даць гарантыю выжывальнасці і дазволіць зменшыць пагрозу для асабістай улады.
Навошта Кітаю Лукашэнка
Беларусь не патрэбная Кітаю эканамічна, таму што эканоміка Беларусі — гэта нават не «крошкі на абедзенным стале». Эканоміка лукашэнкаўскай Беларусі — гэта пыл і ілюзія.
Пасля 2020 года і па цяперашні час мы назіраем, што ў Лукашэнкі не атрымліваецца, ён не ў стане паўтарыць сцэнарый, калі праз саступкі ён спрабуе нармалізаваць адносіны з Захадам, таму што гэтыя саступкі сёння знішчаць яго знутры.
Ён як палітычная жывёла разумее, што вызваленне ўсіх палітвязняў (асабліва актыўных лідараў), спыненне масавых рэпрэсій і нават — пакінем на перспектыву — датэрміновыя выбары прывядуць яго да палітычнай катастрофы.
Кітай — звышдзяржава, і ад Кітая таксама залежыць вырашэнне глабальнага крызісу ў сувязі з вайной Расіі супраць Украіны.
Ці дасць Кітай гарантыі Лукашэнку
Кітай здольны пры пэўных абставінах даць Лукашэнку гарантыі — у выпадку яго адмовы ўпусціць паўторна расійскія войскі на тэрыторыю Беларусі паспрабаваць выключыць краіну з тэатра ваенных дзеянняў і тым самым прадэманстраваць свету сваю ролю, ролю Кітая ў дээскалацыі сітуацыі.
Але гэта для лёсу дыктатара — тактычнае рашэнне, стратэгічна яго лёс нават у вачах Пекіна прадвызначаны. Ён тут шрубка, на якой ужо сарваная разьба.
Другім крокам гэтай стратэгіі могуць стаць магчымыя гарантыі для Лукашэнкі адносна бяспечнага і нябеднага (з улікам нарабаваных у беларускага народа мільярдаў) існавання дыктатара і яго сям’і ў Кітаі — тады, калі ён будзе вымушаны бегчы.
Для Лукашэнкі гульня з Кітаем можа стаць таксама варыянтам, які садзейнічае зацягванню часу, спробай дачакацца палітычнай смерці галоўнага саюзніка — кіраўніка Крамля. Але і ў гэтым варыянце стратэгічна ён прайграе, бо беларускі народ ніколі не даруе яму ўсіх яго злачынстваў.
Лёс Лукашэнкі вырашаны.
