Лукашэнкаўскую практыку знішчэння помнікаў перанялі ў Расіі. У вёсцы Беласток Томскай вобласці, якую ў канцы ХІХ стагоддзя заснавалі перасяленцы з Падляшша і Гарадзеншчыны, зніклі шыльды і крыж з помніка вяскоўцам-ахвярам НКВД.
У вёсцы Беласток Томскай вобласці Расіі быў пашкоджаны помнік мясцовым жыхарам, якія былі ахвярамі камуністычных рэпрэсій 30-х гадоў ХХ стагоддзя.
Вёску Беласток заснавалі ў 90-я гады ХІХ стагоддзя беларусы і палякі-каталікі, якія пераехалі ў Сібір шукаючы вольнай зямлі для заняткаў земляробстваў. У пачатку ХХ стагоддзя насельніцтва вёскі склала каля 500 чалавек. Вяскоўцы пабудавалі касцёл і арганізавалі там таемнае навучанне польскай мовы.
У 1937-1938 гадах многія жыхары вёскі сталі ахвярамі «Польскай аперацыі НКВД», калі ва ўсім СССР было арыштавана 140 тысяч палякаў, з якіх 111 тысяч былі расстраляныя. У вёсцы Беласток было арыштаванае амаль усё мужчынскае насельніцтва — каля ста чалавек.
Пасля распаду СССР у 1990-я гады жыхары сібірскага Беластока сталі адраджаць сваю гістарычную памяць. У вёсцы быў адбудаваны касцёл, а таксама пастаўлены помнік, на якім былі пералічаныя вяскоўцы, якія сталі ахвярамі рэпрэсій НКВД, а таксама Другой сусветнай вайны.
Некалькі тыдняў таму, як паведамляе Radio Białystok са спасылкай на жыхароў вёскі, помнік быў пашкоджаны: зніклі шыльды з імёнамі ахвяраў рэпрэсій, быў знішчаны каталіцкі крыж.
Падобнае здарэнне адбылося таксама і ў Томску — там зніклі шыльды з помніка польскім ахвярам камуністычных рэпрэсій. Хто руйнуе тыя помнікі — невядома. Як бачым, практыка руйнавання польскіх помнікаў з Беларусі перайшла і на Расію.
Болей пра гісторыю сібірскага Беластока можна прачытаць тут.
Аўтар Ян Рамэйка.
