У прасторы NIE TEATR адбыўся вернісаж персанальнай выставы графікі і жывапісу маладога беларускага мастака Уладзіслава Заленскага.
Уладзіслаў Заленскі нарадзіўся ў Мінску, цяпер жыве ў Польшчы. Скончыў Мінскую дзяржаўную гімназію-каледж мастацтваў, але яго аўтарскі стыль вызначаецца сярод іншых стыляў беларускіх мастакоў.
Асаблівасці яго твораў — у экспрэсіі сюррэалістычных вобразаў і каларыту (у жывапісу); абстрактнасці і экспрэсіі ліній і плям (у графіцы). Такім чынам ён адлюстроўвае ўнутраны стан, аналізуе ўнутранае «я» і прапускае праз сябе падзеі, якія адбываюцца вакол.
Яго працы кантрасныя: жывапіс насычаны, выразны, яркі і сюррэалістычны, а графіка — манахромная і абстрактная. Але іх аб’ядноўваюць адыход ад натуралізму, дынаміка, эмацыянальнасць і адлюстраванне свету аўтара праз прызму падзей.
Гэтая выстава ўключае ў сябе 10 твораў, сярод якіх — жывапіс і графіка, створаныя з 2020 па 2022 гады.
Адной з самых яркіх графічных прац з’яўляецца «Дысцыпліна Падпаленых Замкаў» (2022 год). На вернісажы мастак удзяліў ёй асаблівую ўвагу:
— Уявіце сабе, што была некая вёска, дзе жыло шмат людзей са сваімі пачуццямі, сваёй культурай. І вось пасля гэтых падзей, якія нахлынулі на нашу краіну, і не толькі на нашу, гэтая вёска і людзі апынуліся пад заваламі. Але гэта не нейкае гора. Гэта не тое, што выбівае іх з каляіны. Яны працягваюць жыць, ведаючы, што яны трывалыя. Яны ў гэтым існуюць.
Кожная падзея ў свеце адлюстроўваецца на палотнах мастакоў. Сёння большасць твораў сучаснага мастацтва носіць сацыяльны характар. Людзі, якія займаюцца творчасцю не могуць не рэагаваць на сацыяльна-палітычныя падзеі.
На гэтых палотнах адлюстраваныя метамарфозы, змены ўнутранага света мастака. Ён пераасэнсоўвае рэчаіснасць і сябе, у залежнасці ад бегу падзей вакол. Адсюль і назва выставы – Istotne Przemiany («Істотныя Пераўтварэнні»). Увайшоўшы ў залу, глядач можа ўбачыць цэлую гісторыю, якая разгортваецца перад ім.
Таксама на гэтай выставе можна набыць любы твор і падтрымаць сучаснае беларускае мастацства.
Выстава працягваецца да 8 студзеня 2023 года ў прасторы NIE TEATR (Henryka Sienkiewicza 4) на другім паверсе.
Куратар выставы Ганна Маніна.
