На пачатку снежня 2022 года з’явілася інфармацыя, што вучні некаторых школ Гродна бралі ўдзел у квіз-гульні, прысвечанай «русскому миру» — «Дню герояў айчыны», якая была арганізаваная Домам дзіцячай творчасці Санкт-Пецярбурга.
Заданні гэтай гульні, так і суправаджальныя агітацыйныя малюнкі паказваюць, што прадметам квізу была расійская гісторыя да расійскія «героі айчыны». На малюнку, апроч трыкалора, бачныя таксама так званая «георгіеўская», альбо «каларадская» стужка. Гэта стужка стала сімвалам узброенай агрэсіі Расіі супраць суседніх краін, у тым ліку і Украіны.
Ёсць імавернасць, што пытанні ў квіз-гульне датычыліся і ўдзельнікаў расійскай агрэсіі ва Украіне. Частка расійскіх вайскоўцаў за ўдзел у вайне атрымала званне «героя Расіі». Мяркуючы па ўсім, мэтай гэтага мерапрыемства было выхаванне беларускіх дзяцей у духе агрэсіўна-імперскага расійскага «патрыятызму».
Навошта гэты квіз праводзілі ў Гродне
У якасці падставы для правядзення квізу называецца Дамова аб супрацоўніцтве паміж Гродзенскім аблвыканкамам і адміністрацыяй Цэнтральнага раёна Санкт-Пецярбурга, якую заключылі 2 верасня 2022 года. Уладзімір Каранік, які падпісаў дамову з боку Беларусі, сказаў, што асноўным яе зместам ёсць супрацоўніцтва ў гуманітарнай сферы.
Атрымалася высветліць, што ў гульні прымалі ўдзел 16-я, 20-я, 27-я і 39-я школы Гродна.
Дзецям, якія занялі высокія месцы па выніках гульні, выдавалі «дыпломы».
Хутчэй за ўсё, удзел менавіта гэтых школ у расійскім мерапрыемстве не стаў выпадковым. Напрыклад, дырэктар школы №39 Аксана Пятрова ўдзельнічала ў скліканым Лукашэнкам у 2021 годзе «Усебеларускім народным сходзе». А за паўгода да гэтага, калі была старшынёй выбарчай камісіі, падчас падліку галасоў пагражала незалежнай назіральніцы. Дырэктары школ №20 і №27, Наталля Сцяпанава і Мікалай Салянскі, адзіныя сярод прадстаўнікоў навучальных устаноў Гродзеншчыны, каго Лукашэнка ўганараваў падзякай у снежні 2020 года.
