Польшча ўнесла ў санкцыйны спіс 12 грамадзян Беларусі, якія падтрымалі расійскую агрэсію супраць Украіны. Санкцыйны спіс быў створаны яшчэ ў красавіку 2022 года, але дагэтуль там былі толькі расіяне. MOST даведаўся, каму з беларусаў забаранілі ўезд у Польшчу з-за падтрымкі Расіі.
У санкцыяным спісе знаходзяцца расійскія кампаніі, фізічныя асобы (у асноўным, «кашалькі» Уладзіміра Пуціна), а таксама туды ў лістападзе 2022 года трапілі беларусы. Большасць з іх — члены беларускай дэлегацыі ў АБСЕ і дэпутаты Нацыянальнага сходу.
Дэпутаты, былыя міліцыянеры, трансплантолаг
- Сяргей Рачкоў. З’яўляецца старшынёй Пастаяннай камісіі Савета Рэспублікі па міжнародных справах і нацыянальнай бяспецы ад 2019 года. Неаднаразова рабіў заявы наконт паўнамаштабнай расійскай агрэсіі ва Украіне, знаходзячыся на баку Расіі. Агенцтва нацыянальнай бяспекі Польшчы адзначае, што Рачкоў заяўляў, што Польшча вінаватая ў напружанай сітуацыі на польска-беларускай мяжы і ўмешваецца ва ўнутраныя справы Беларусі.
- Канстанцін Драздоўскі. Сенатар, член камісіі па адукацыі, навуцы, культуры і сацыяльнаму развіццю. Польскія ўлады акрэсліваюць Драздоўскага як прыхільніка рэжыму Аляксандра Лукашэнкі і расійскай агрэсіі ва Украіне.
- Дзяніс Карась. Дэпутат Палаты прадстаўнікоў, уваходзіць у дэлегацыю Нацыянальнага сходу Беларусі ў Парламенцкай асамблеі Арганізацыі па бяспецы і супрацоўніцтву ў Еўропе. Па інфармацыі польскіх спецслужбаў, Карась сцвярджаў, што Польшча і краіны Балтыі выкарыстоўваюць міграцыйны крызіс, каб «прыцягнуць да сябе ўвагу і грошы заходніх краін».
- Святлана Горваль. Дэпутат Палаты прадстаўнікоў, уваходзіць у дэлегацыю Нацыянальнага сходу Беларусі ў Парламенцкай асамблеі Арганізацыі па бяспецы і супрацоўніцтву ў Еўропе.
- Іван Мамайка. Дэпутат Палаты прадстаўнікоў, член Пастаяннай камісіі па нацыянальнай бяспецы. Былы супрацоўнік міліцыі. Мамайка абвінавачвае Польшчу ў гібрыднай дзейнасці.
- Алег Руммо. Член Савета Рэспублікі, член камісіі па міжнародных справах і нацыянальнай бяспецы. Руммо неаднаразова выступаў у дзяржаўных медыя ў якасці эксперта па міжнародным становішчы, абвінавачваючы Польшчу ў міграцыйным крызісе.
- Андрэй Савіных. Дэпутат Палаты прадстаўнікоў. Польскія спецслужбы лічаць Савіных ярым прыхільнікам рэжыму, які адказны за распаўсюд матэрыялаў, што накіраваныя супраць польска-беларускіх адносін і іміджа Польшчы на міжнароднай арэне.
- Ганна Семянюк. Намеснік начальніка ўпраўлення міжнароднага супрацоўніцтва Сакратарыята Палаты прадстаўнікоў.
- Сяргей Стэльмашок. Дэпутат Палаты прадстаўнікоў, член Пастаяннай камісіі па бюджэце і фінансах.
- Ігар Таўтын. Дэпутат Палаты прадстаўнікоў, уваходзіць у дэлегацыю Нацыянальнага сходу Беларусі ў Парламенцкай асамблеі Арганізацыі па бяспецы і супрацоўніцтву ў Еўропе.
- Валер Варанецкі. Дэпутат Палаты прадстаўнікоў, уваходзіць у дэлегацыю Нацыянальнага сходу Беларусі ў Парламенцкай асамблеі Арганізацыі па бяспецы і супрацоўніцтву ў Еўропе.
- Дзмітры Варанюк. Сенатар Савета Республікі.
