Адвакат Віталя з Брэста, які пераплыў Буг, уцякаючы ад крымінальнага пераследу з Беларусі ў Польшчу, і быў затрыманы там за незаконнае перасячэнне мяжы, распавёў Еўрарадыё некаторыя дэталі справы.
«На мой погляд, сабраныя доказы не дазваляюць устанавіць яго віну і ёсць падставы для вынясення апраўдальнага прысуду ў судзе. Акрамя таго, у адпаведнасці з міжнародным і нацыянальным заканадаўствам, асоба, якая ёсць уцекачом, не можа быць абвінавачаная ў незаконным перасячэнні мяжы», — расказвае Томаш Віліньскі.
Дагэтуль застаецца рызыка выдачы мужчыны ў Беларусь.
— Калі такі запыт будзе зроблены, я не думаю, што ў Польшчы знойдзецца суддзя, які вырашыць перадаць беларускім уладам грамадзяніна з картай паляка і статусам уцекача, — сумняваецца адвакат. — Віталь знаходзіцца ў добрым стане і нармальна абжываецца ў Польшчы. У сувязі з неабходнасцю забеспячэння інтарэсаў Віталя я не магу разгалошваць месца яго пражывання, бо ў Польшчы актыўна дзейнічаюць беларускія спецслужбы і могуць быць спробы затрымання Віталя. Тым больш што ў Беларусі выдадзены ордар на ягоны арышт.
Судовы працэс над Віталём працягнецца 11 лютага 2022 года ў акруговым судзе ў Бяла-Падлясцы. Яго могуць асудзіць на тэрмін да трох гадоў турэмнага зняволення. Да васьмі гадоў пазбаўлення волі пагражае сябрам Віталя — Барталамею і Алене, якія сустракалі мужчыну ў Польшчы. Іх абвінавачваюць у арганізацыі незаконнага перасячэння мяжы.
Па словах затрыманага, ён быў прадпрымальнікам у Брэсце. Пасля падзей жніўня-2020 у Беларусі яго аб’явілі ў крымінальны вышук. Мужчына сцвярджае, што на радзіме яму пагражае каля дзесяці гадоў турмы. Таму ён нелегальна перайшоў мяжу з мэтай атрымаць палітычнае прыстанішча.
