16 лютага беларусы Беластока ў Варшаве падтрымалі данецкі «Шахцёр» у матчы Лігі Еўропы супраць французскага «Рэна». Гэта не пешы матч, дзе беларусы падтрымліваюць украінскі клуб. З Беластока яны амаль рэгулярна ездзяць у Варшаву заўзець за гэтую каманду ў еўракубках.
Беларусы робяць гэта з бел-чырвона-белымі сцягамі і ў майках з прозвішчам палітзняволенага журналіста Аляксандра Івуліна. Апошні матч падтрымкі прайшоў 16 лютага. Гульня скончылася перамогай украінскай каманды — 2:1. Для беларусаў гэта ўжо чацвёрты выезд у Варшаву з Беластока. Сваю гісторыю для MOST расказаў беларус Аляксандр Каваленка, які жыве ў Беластоку амаль два гады.
— Да гэтага матчу мы ездзілі ў Варшаву на тры гульні «Шахцёра» у рамках Лігі чэмпіёнаў, цяпер клуб гуляе ў Лізе Еўропы. Па-першае, еўракубкі — гэта статусныя турніры. У Беларусі было прэстыжна трапіць на такія матчы, з’язджаліся людзі ў Мінск і Барысаў з розных канцоў краіны. Цяпер мы ў Польшчы і ёсць магчымасць наведваць статусныя матчы ў Варшаве, — распавядае беларус.
Аляксандр распавядае, што ён актыўны беларус і паехаць проста як глядач на футбол, ён з сябрамі не мог.
— Мы не маглі не абазначыцца. З першага матчу на футбол узялі беларускія сцягі і майкі, каб людзі разумелі, што мы беларусы, якія прыехалі падтрымаць украінскую каманду. Я не магу сказаць, што мы адданыя заўзятары «Шахцёра» і заўсёды заўзелі за гэтую каманду. Не. Але гэтай камандзе трэба аддаць належнае, яна сёння прадстаўляе ўвесь украінскі спорт. А Украіна знаходзіцца ў стане вайны ўжо год і клуб практычна без унутранага чэмпіянату выходзіць на такі ўзровень. А беларускія клубы, у якіх на гэты момант нібыта ўсё добра, нават нельга параўноўваць з «Шахцёрам».
За чатыры гульні беларусы ні разу не сутыкнуліся з негатывам на варшаўскім стадыёне з боку палякаў і ўкраінцаў.
— Толькі словы падзякі для нашага маленькага фан-сектара. Футбол аб’ядноўвае, — кажа Аляксандр.
Таксама беларус адзначыў, што такія матчы даюць магчымасць чарговы раз нагадаць пра палітвязняў у Беларусі. На футбольныя матчы ў Варшаву беларусы бяруць майкі з прозвішчам Аляксандра Івуліна — спартоўца і журналіста, які цяпер знаходзіцца ў зняволенні.
— Такім чынам мы падтрымліваем «Шахцёр» і выказваем падтрымку Сашы, а ён усё яшчэ дзейны футбаліст «Крумкачоў». Да нядаўняга часу ў нас былі майкі і сцягі, але да апошняга матчу зрабілі яшчэ спецыяльныя шапкі. Гэта дапамагло нам яшчэ больш вылучыцца на варшаўскім стадыёне і таму да нас далучаліся і іншыя беларусы.
