Амаль 11 тысяч жыхароў Падляскага ваяводства знаходзяцца на каранціне або ізаляцыі, піша Polskie Radio Białystok. Каго гэта тычыцца і ці можна скараціць тэрмін ізаляцыі?
Каранцін распаўсюджваецца на людзей, якія, напрыклад, кантактавалі з чалавекам, інфікаваным каронавірусам. У большасці выпадкаў ён доўжыцца сем дзён. Але калі вы жывяце з інфікаваным чалавекам, каранцін будзе абавязковым цягам усяго перыяду ізаляцыі дамачадца, у якога быў знойдзены COVID-19, плюс сем дзён пасля завяршэння ізаляцыі.
Ад такога каранціну не вызваліць нават адмоўны вынік тэсту. У сваю чаргу, калі тэст будзе станоўчым, прыйдзецца правесці ў ізаляцыі дзесяць дзён (медыцынскія работнікі або афіцэры маюць больш кароткую ізаляцыю і каранцін — ад пяці да сямі дзён).
Калі падчас гэтай ізаляцыі ў вас няма прыкмет захворвання, то яна будзе доўжыцца 10 дзён. З іншага боку, калі пачынаеце хварэць, ізаляцыя заканчваецца праз тры дні пасля спынення рэспіраторных сімптомаў, але не раней, чым праз 13 дзён пасля іх узнікнення. Лекар можа вырашыць падоўжыць ізаляцыю.
На каранцін таксама аўтаматычна трапляеце ў момант, калі атрымліваеце накіраванне на тэст. Такі каранцін доўжыцца да моманту атрымання адмоўнага выніку, але не больш за сем дзён. Гэта таксама не адносіцца да людзей, звязаных з медыцынай.
